დღეს საქართველოში არის ძალიან რთული ვითარება - ჩვენ ჩვენი მხრივ ის მდგომარეობა გავაცანით, რაც დღეს არის საქართველოში - ამის შესახებ თვითონაც ძალიან კარგად არიან ინფორმირებულები, - ამის შესახებ „ახალგაზრდა იურისტთა ასოციაციის“ თავმჯდომარემ, ნონა ქურდოვანიძემ ევროკავშირის სამეზობლო და გაფართოების საკითხებზე მოლაპარაკებების გენერალურ დირექტორთან, გერტ იან კოპმანთან შეხვედრის შემდეგ ჟურნალისტებს განუცხადა.

მისივე თქმით, მსგავს კრიტიკულ სიტუაციაში ასეთი ვიზიტი მნიშვნელოვანია.

„დღეს საქართველოში არის ძალიან რთული ვითარება. ეს ყველას ესმის, მათ შორის, ჩვენს საერთაშორისო პარტნიორებს, ეს ვიზიტი ძალიან მნიშვნელოვანია, ამ კრიტიკულ დროს. ჩვენ ჩვენი მხრივ ის მდგომარეობა გავაცანით, რაც დღეს არის საქართველოში და ამის შესახებ თვითონაც ძალიან კარგად არიან ინფორმირებულები. ძალიან მნიშვნელოვანი „მესიჯი“, რაც ჩვენ გვაქვს ჩვენი დასავლელი პარტნიორებისგან არის ის, რომ ევროკავშირის წევრობა და საქართველოს ხალხის, მოსახლეობის გვერდში დგომა არის მნიშვნელოვანი. ეს ჩვენთვის ძალიან მნიშვნელოვანი გზავნილია“, - აღნიშნა ნონა ქურდოვანიძემ.