ვლადიმერ პუტინის ინაუგურაციას საფრანგეთის ელჩი დაესწრება, გერმანიამ კი კონსულტაციების მიზნით რუსეთიდან ელჩი გაიწვია, - ამის შესახებ ინფორმაციას სააგენტო Reuters-ი ავრცელებს.

„საფრანგეთი რუსეთში მისი ელჩით იქნება წარმოდგენილი“, - განუცხადა Reuters-ს ფრანგულმა დიპლომატიურმა წყარომ.

გერმანიამ, მოსკოვიდან ელჩი, ალექსანდრ გრაფ ლამბსდორფი კონსულტაციებისთვის მას შემდეგ გაიწვია, რაც ბერლინმა რუსეთი „სოციალ-დემოკრატიული პარტიის“ წევრების პირად ანგარიშებზე თავდასხმაში დაადანაშაულა.

შეგახსენებთ, ვლადიმერ პუტინის ინაუგურაცია 7 მაისს არის დაგეგმილი და გერმანიის მსგავსად, მას არც ჩეხეთის, ესტონეთის, დიდი ბრიტანეთის, კანადის, ლატვიისა და ლიეტუვის წარმომადგენლები დაესწრებიან. ასევე, სომხეთის პარლამენტის სპიკერის ცნობით, ვლადიმერ პუტინის ინაუგურაციას პრემიერ-მინისტრი, ნიკოლ ფაშინიანიც არ დაესწრება.