ისრაელში ათასობით მოქალაქემ საპროტესტო აქცია გამართა და ქვეყნის მთავრობას მოუწოდა, დათანხმდეს ცეცხლის შეწყვეტის შეთანხმების პირობებს, რომელიც „ჰამასმა“ მიიღო.

თელ-ავივში, თავდაცვის შტაბთან დაახლოებით 1 000 მომიტინგე შეიკრიბა, ხოლო იერუსალიმში შეკრებილი დემონსტრანტები პრემიერ-მინისტრ ბენიამინ ნეთანიაჰუს რეზიდენციისკენ გაემართნენ და ხელში ეჭირათ ბანერი წარწერით „სისხლი თქვენს ხელებზეა“.

The Times of Israel-ის ცნობით, პოლიციამ ორჯერ დაარბია მომიტინგეები, რომლებიც თელ-ავივის აიალონის გზატკეცილზე მოძრაობას ბლოკავდნენ. სამართალდამცავებმა რამდენიმე ადამიანი დააკავეს.

საპროტესტო აქციები ასევე დაფიქსირდა ისრაელის სხვა ქალაქებში, მათ შორის რაანანაში, ბეერ-შევასა და ხაიფაში.

შეგახსენებთ, „ჰამასის“ განცხადებით, ღაზაში ცეცხლის შეწყვეტის შესახებ ეგვიპტისა და კატარის წინადადებას დათანხმდა. „ბურთი ახლა ისრაელის მოედანზეა“, - აღნიშნა „ჰამასის“ ოფიციალურმა წარმომადგენელმა. ისრაელმა განაცხადა, რომ ცეცხლის შეწყვეტის პირობები მათ მოთხოვნებს არ აკმაყოფილებს.