ხელისუფლება პანიკაშია, ეს პანიკის მაჩვენებელია, ამით ვერავინ ვერავის დააშინებს, - ამის შესახებ პარტია „ლელოს“ ერთ-ერთმა ლიდერმა, ლევან სამუშიამ საქართველოში ბოლო დღეებში მომხდარ ძალადობრივ ინციდენტებზე საუბრისას განაცხადა.

როგორც მან „პალიტრანიუსის“ გადაცემაში „რეზიუმე“ აღნიშნა, საქართველოს მოქალაქეებს გადაწყვეტილება მიღებული აქვთ, რასაც 26 ოქტომბერს საარჩევნო უბნებთან აღასრულებენ.

„ხელისუფლება პანიკაშია, ეს პანიკის მაჩვენებელია, ამით ვერავინ ვერავის დააშინებენ. საქართველოს მოქალაქეებს რუსულ ხელისუფლებაზე და „რუსულ ოცნებაზე“ გადაწყვეტილება გამოტანილი აქვთ. ხელისუფლებას ვეუბნები: თქვენს დანაშაულში, კიდევ სხვებს ნუ ჩაითრევთ. მალე იქნება ოქტომბერი და საქართველოს მოქალაქეები საარჩევნო უბნებთან იმ გადაწყვეტილებას აღასრულებენ, რა გადაწყვეტილებაც გამოტანილი აქვთ. ამაში, რომ დარწმუნებული ხართ, მაგიტომ ხართ პანიკაში“, - განაცხადა სამუშიამ.

როგორც მან შვედეთის საელჩოსთან ტელეკომპანია „ფორმულას“ გადამღებ ჯგუფსა და „ინფორმაციის თავისუფლების განვითარების ინსტიტუტის“ (IDFI) დირექტორ, გიორგი კლდიაშვილზე თავდასხმაზე საუბრისას აღნიშნა, მომხდარი არის მორიგი სისხლის სამართლის დანაშაული, სადაც კადრებშიც ჩანს, ვინ არის თავდამსხმელი.

„სად არის გამოძიება? უტყუარი მტკიცებულებებია, სავარაუდო დანაშაულის ჩადენის. სახელი, გვარი, სახე, მანქანის ნომრები - სად არის გამოძიება, თუ თქვენი მართული არ არის?

ასევე, საქართველოს პარლამენტის წევრებზე თავდასხმა, ერთ შემთხვევაში ალეკო ელისაშვილზე, მეორე შემთხვევაში ლევან ხაბეიშვილზე. როგორც ხაბეიშვილს, ისე ელისაშვილს მძიმე ტრავმები აქვთ მიყენებული. უკვე თქვეს, რომ არ გვჭირდება გამოძიებაო, ჩვეულებრივ რუსული რეჟიმია! რუსეთში ასე აკეთებენ და ამ ყველაფრის კოპირება მიმდინარეობს. გამოძიება გააუქმეს! „გამოძიება მიმდინარეობს“ - ეს სასაცილოდ ქცეული ფრაზაა.

კიდევ ერთი მაგალითი - ირაკლი კუპრაძე. ხელებაწეული ადამიანი, სრულიად უსაფუძვლოდ დააკავეს. ფიზიკურად იძალადეს. სად არის ირაკლი კუპრაძეზე, სავარაუდოდ განხორციელებული სისხლის სამართლის დანაშაულზე გამოძიების შედეგები?“,- განაცხადა სამუშიამ.