მარიამ ქვრივიშვილი გერმანიის ეკონომიკისა და კლიმატის დაცვის ფედერალური სამინისტროს სახელმწიფო მდივანს შეხვდა

საქართველოს ეკონომიკისა და მდგრადი განვითარების მინისტრის მოადგილე, მარიამ ქვრივიშვილი გერმანიის ეკონომიკისა და კლიმატის დაცვის ფედერალური სამინისტროს სახელმწიფო მდივანს, სვენ გიგოლდს შეხვდა, რომელიც თბილისში გერმანული კერძო კომპანიების დელეგაციასთან ერთად იმყოფება.

ამის შესახებ ინფორმაციას საქართველოს ეკონომიკისა და მდგრადი განვითარების სამინისტრო ავრცელებს.

უწყების ცნობით, ეკონომიკის სამინისტროში გამართულ შეხვედრაზე მხარეებმა ორი ქვეყნის ეკონომიკური თანამშრომლობის მნიშვნელოვანი საკითხები განიხილეს, მათ შორის ტურიზმის, ვაჭრობისა და ინვესტიციების სფეროებში.

„შეხვედრის ფარგლებში ქართულმა მხარემ სტუმრებს ვრცელი პრეზენტაცია წარუდგინა, სადაც დეტალურად იყო მიმოხილული საქართველოს საინვესტიციო გარემო, ეკონომიკური მაჩვენებლები, ტურიზმისა და ავიაციის სფეროს აღდგენა/განვითარების დინამიკა, მცირე და საშუალო ბიზნესის ხელშეწყობის პროგრამები, ექსპორტის წახალისების მექანიზმები, საქართველოს პოზიციები საერთაშორისო რეიტინგებში და ა.შ.

როგორც მარიამ ქვრივიშვილმა აღნიშნა, საქართველო აფასებს პარტნიორობას, მჭიდრო და აქტიურ თანამშრომლობას გერმანიასთან წლების განმავლობაში. მისი თქმით, მთავრობის ეკონომიკური პოლიტიკა, რეფორმები, ბიზნესის ხელშეწყობის სახელმწიფო პროგრამები თუ სხვადასხვა აქტივობები მიმართულია იქითკენ, რომ საქართველომ მუდმივად შეინარჩუნოს მიმზიდველი საინვესტიციო გარემო და საინტერესო იყოს, მათ შორის, გერმანული ბიზნესისთვის, რომელთა წარმომადგენლებსაც ჰქონდათ შესაძლებლობა, შეხვედრის ფარგლებში მიეღოთ მაქსიმალური ინფორმაცია მათთვის საინტერესო საკითხებზე. მინისტრის მოადგილემ კიდევ ერთხელ ხაზი საქართველოს საგარეო პოლიტიკის მთავარ მიზანს გაუსვა - ევროკავშირში გაწევრიანებას და ამ კუთხით შესაბამისი რეფორმების გაგრძელების აუცილებლობას.

შეხვედრაზე ითქვა, რომ საქართველოსა და გერმანიის ნაყოფიერი ეკონომიკური თანამშრომლობა ყოველწლიურად კიდევ უფრო ვითარდება, რასაც სტატისტიკური მაჩვენებლებიც მოწმობს, 2023 წელს გერმანია იყო მე-4 ადგილზე საქართველოში პირდაპირი უცხოური ინვესტიციების განხორციელების რაოდენობით, ხოლო 2024 წლის 1 კვარტლის მონაცემებით, გერმანიიდან შემოსული ვიზიტორების ოდენობა, წინა წლის ანალოგიური პერიოდის მაჩვენებელზე 48%-ით მეტია.

ხაზგასმით აღსანიშნია, ასევე მზარდი დინამიკა ავიაციის სფეროში: 2024 წლის იანვარ-თებერვლის პერიოდში, საქართველოსა და გერმანიას შორის პირდაპირი რეგულარული რეისების შედეგად გადაყვანილმა მგზავრების რაოდენობამ 64.2%-ით მეტი შეადგინა - 2023 წლის ანალოგიურ პერიოდში გადაყვანილი მგზავრების რაოდენობასთან შედარებით, ხოლო 2023 წელს, 83.2%-ით მეტი მგზავრია გადაყვანილი, ვიდრე 2022 წელს”,-წერია გავრცელებულ ინფორმაციაში.

ემილ ავდალიანი - ის, რაც დღეს ხდება საქართველოში თუ ქვეყნის საგარეო პოლიტიკაში, რუსეთს უნდა აწყობდეს, რადგან ასეთი შედარებით ქაოტური ვითარება მოსკოვს ბევრ საშუალებას აძლევს
აკადემიკოსი რამაზ ხუროძე - საჭიროა სახელმწიფოს მიერ მეცნიერებაზე გაწეული ხარჯების ეფექტიანობის შეფასება და შესაბამისად, ამ ხარჯების კორექტირება
ქართული პრესის მიმოხილვა 24.05.2024
„გალფის“ მხარდაჭერით 20 სტუდენტი აფხაზეთიდან ევროპის ჩემპიონატზე ეროვნული ნაკრების მატჩზე დასასწრებად გერმანიაში გაემგზავრება
„თიბისის“ მხარდაჭერით, ანტიკური კოლხეთის ქალაქი - ვანი, ეტრუსკული ცივილიზაციისადმი მიძღვნილ გამოფენას მასპინძლობს
BTU-ს AI-ს საბაკალავრო პროგრამას აკრედიტაცია მიენიჭა