ქუთაისში „ქართული ოცნების“ ოფისთან ხმაური იყო. "უცხოური გავლენის გამჭვირვალობის შესახებ" კანონპროექტის საწინააღმდეგო აქციის მონაწილეებმა მსვლელობით "ქართული ოცნების" ოფისთან გადაინაცვლეს, სადაც სკანდირებდნენ: "მონებო", რასაც ადგილზე მყოფი "ქართული ოცნების" წევრების და მხარდამჭერების უკმაყოფილება მოყვა.

ადგილზე ხმაური და სიტყვიერი დაპირისპირება იყო.

აქციის მონაწილეების თქმით, მათ აქცია გუშინ დაგეგმეს და დღეს ხელისუფლებამ მათ აქტივისტები დაახვედრა, რაც მათ შიშზე მიუთითებს. "ქართული ოცნების" ოფისთან მყოფებმა კი აქციის მონაწილეებს მოუწოდეს, დროშას ნუ არცხვენენ და დატოვონ ტერიტორია.

ამის შემდეგ აქციის მონაწილეებმა მსვლელობით მერიასთან გადაინაცვლეს. მათი თქმით, ისინი იბრძოლებენ და წნეხისგან გაათავისუფლებენ საჯარო მოხელეებსაც.