ჩიტაძის ქუჩაზე შეკრებილ აქციის მონაწილეებს სამართალდამცველებმა 5 წუთი მისცეს იმისთვის, რომ მათ ტერიტორია დატოვონ და პარლამენტის წინ გადაინაცვლონ, თუმცა, მოქალაქეები ჯერჯერობით, ჩიტაძის ქუჩას არ ტოვებენ. პოლიცია ჩიტაძის ქუჩისკენ დაიძრა, სადაც მოქალაქეები რჩებიან.

სავარაუდოდ, სპეცრაზმი აქციის მონაწილეების დაშლას გეგმავს. პარლამენტის მიმდებარე ტერიტორიაზე მობილიზებული არიან სპეცრაზმელები და ე.წ. რობოკოპები.

შინაგან საქმეთა სამინისტრომ საკანონმდებლო ორგანოს შენობის მიმდებარე ტერიტორიაზე მყოფ პირებს მოუწოდა, არ მოახდინონ პარლამენტის შესასვლელების ბლოკირება, ასევე, თავი შეიკავონ კანონსაწინააღმდეგო და ძალადობრივი ქმედებებისგან.

აქცია პარლამენტთან 12 მაისის 22:00 საათიდან მიმდინარეობს და მონაწილეები განთავსებულნი არიან პარლამენტის მიმდებარე ქუჩებზე, მათ შორის ზ. ჟვანიას, შ. ჩიტაძისა და ბ. ჭიჭინაძის ქუჩებზე არსებულ საპარლამენტო ორგანოს შესასვლელებთან.

აქციის ორგანიზატორები და მონაწილეები საჯაროდ აცხადებენ, რომ ისინი არ მისცემენ დეპუტატებს 13 მაისს, 09:00-ზე დაგეგმილ პარლამენტის იურიდიული კომიტეტის სხდომაზე დასწრების და მასში მონაწილეობის საშუალებას.