ბათუმის საზღვაო აკადემიის სტუდენტების ნაწილი აცხადებს, რომ უერთდებიან პროტესტს და უარს აცხადებენ აკადემიური პროცესის ჩვეულ რეჟიმში გაგრძელებაზე
ბათუმის სახელმწიფო საზღვაო აკადემიის სტუდენტები ვუერთდებით პროტესტს და უარს ვაცხადებთ აკადემიური პროცესის ჩვეულ რეჟიმში გაგრძელებაზე, - ამის შესახებ ბათუმის საზღვაო აკადემიის სტუდენტებმა განაცხადეს.
მათი თქმით, „უცხოური გავლენის გამჭვირვალობის შესახებ“ კანონპროექტი მათთვის მიუღებელია და სამომავლოდ პროფესიულ საქმიანობაში ხელს შეუშლით.
საზღვაო აკადემიის სტუდენტები ბათუმის შოთა რუსთაველის სახელობის სახელმწიფო სტუდენტების პროტესტს შეუერთდებიან და მსვლელობას მოაწყობენ.
„ეს აქტი არის მკაფიო გზავნილი საქართველოს ხელისუფლებასთან, რომ უნდა გაიწვიონ რუსული კანონი და შეწყვიტონ ძალის გამოყენება აქციის მშვიდობიანი მონაწილეების წინააღმდეგ, რაც არღვევს ჩვენს კონსტიტუციურ უფლებას სიტყვის და აზრის გამოხატვის თავისუფლების შესახებ. რუსული კანონი აფერხებს საქართველოს ევროპულ მომავალს და ქართული დემოკრატიული სახელმწიფოს მშენებლობას, რასაც ქართველი ხალხი არ დაუშვებს. მოვუწოდებთ ჩვენს ლექტორებსა და ადმინისტრაციას გააკეთონ ისტორიულად სწორი არჩევანი და დადგნენ ჩვენს გვერდით, ჩვენი და მათი შვილების მომავლისთვის. კი ევროპას, არა რუსულ კანონს,” - აცხადებენ ბათუმის საზღვაო აკადემიის სტუდენტები.
