პარლამენტის უკანა შესასვლელთან „უცხოური გავლენის გამჭვირვალობის შესახებ“ საწინააღმდეგო აქციის მონაწილეები იკრიბებიან.

9 აპრილის ქუჩის მხარეს მობილიზებულია სამართალდამცველების დიდი რაოდენობა. ასევე, გმირთა მემორიალთან მობილიზებულია სპეცრაზმი და წყლის ჭავლის მანქანები.

ცნობისთვის, „ქართული ოცნების“ უმრავლესობა „უცხოური გავლენის გამჭვირვალობის შესახებ“ კანონპროექტის მესამე მოსმენით განხილვას და კენჭისყრით დამტკიცებას სწორედ დღევანდელ პლენარულ სხდომაზე გეგმავს. მესამე მოსმენა მხოლოდ ტექნიკურ-რედაქციული შინაარსის განხილვას ითვალისწინებს. ამით კანონპროექტის საპარლამენტო განხილვის პროცესი დასრულდება და კანონი ხელმოსაწერად პრეზიდენტს გადაეცემა.

ცნობილია, რომ პრეზიდენტი სალომე ზურაბიშვილი კანონზე ვეტოს დადებას გეგმავს.