ევროპის საბჭო მზადაა საქართველოს საერთაშორისო სტანდარტებთან სრული შესაბამისობის მიღწევის უზრუნველყოფაში დაეხმაროს, - ამის შესახებ ევროპის საბჭოს გენერალური მდივნის, მარია პეიჩინოვიჩ ბურიჩის განცხადებაშია აღნიშნული.

მისი თქმით, საქართველოს პარლამენტის მიერ „უცხოური გავლენის გამჭვირვალობის შესახებ“ კანონპროექტის მესამე მოსმენით მიღება, ვენეციის კომისიის დასკვნების გარეშე, იმედგამაცრუებელია და კონსტრუქციული დიალოგის სულისკვეთებას არ გამოხატავს.

„სამწუხაროდ, კანონპროექტის დემოკრატიისა და ადამიანის უფლებების ევროპულ სტანდარტებთან შეუთავსებლობის შესახებ საერთაშორისო პარტნიორების შეშფოთების იგნორირება მოხდა და ნამდვილი საპარლამენტო დებატების ნაკლებობა ინკლუზიურ დემოკრატიულ პროცესს არ შეესაბამება“, - აცხადებს მარია პეიჩინოვიჩ ბურიჩი.

მარია პეიჩინოვიჩ ბურიჩი აღნიშნავს, რომ ვენეციის კომისიის სამართლებრივმა რეკომენდაციებმა, რომელსაც კომისია ძალიან მალე გამოაქვეყნებს, კონსტრუქციული დიალოგის საფუძველი უნდა შექმნას და პროგრესის მიღწევა ევროპის საბჭოს ნორმებისა და ღირებულებების შესაბამისად უნდა მოხდეს.

„მე ასევე ღრმად შეშფოთებული ვარ ცნობებით, მათ შორის საქართველოს სახალხო დამცველის მხრიდან, დაშინების კამპანიების, ფიზიკური თავდასხმების, ძალის არაპროპორციული გამოყენების, უკანონო დაკავებების, პერსონალური მონაცემების გავრცელების და მშვიდობიანი დემონსტრანტების, სამოქალაქო აქტივისტების, ჟურნალისტების და ოპოზიციის წარმომადგენლების მიმართ სტიგმატიზებული ოფიციალური ნარატივების გამოყენების შესახებ. მოვუწოდებ საქართველოს ხელისუფლებას, მიიღოს სასწრაფო ზომები, რათა მსგავსი ქმედებები თავიდან აიცილოს, რომლებიც დემოკრატიული საზოგადოების პრინციპებთან შეუთავსებელია და უფლებების სავარაუდო დარღვევის შემთხვევების შესახებ ყველა ცნობის სათანადო და ეფექტური გამოძიება უზრუნველყოს. ევროპის საბჭო მზადაა საქართველოს საერთაშორისო სტანდარტებთან სრული შესაბამისობის მიღწევის უზრუნველყოფაში დაეხმაროს, რაც განამტკიცებს მის დემოკრატიულ განვითარებასა და ევროკავშირში გაწევრიანებისკენ შემდგომ პროგრესს“, - ნათქვამია განცხადებაში.