რუსეთის პრეზიდენტი ვლადიმერ პუტინი ჩინეთში ჩავიდა, - ინფორმაციას რუსული მედია ავრცელებს.

მათივე ინფორმაციიით, ვიზიტი ორ ეტაპიანი იქნება: 16 მაისს პუტინი პეკინში გაატარებს, 17 მაისს კი ხეილუნძიანის პროვინციის ადმინისტრაციულ ცენტრს, ჰარბინს ეწვევა.

პრეზიდენტის თანაშემწის, იური უშაკოვის განცხადებით, პირველი დღის პროგრამა, სავარაუდოდ, ძალიან საინტერესო იქნება და, პირველ რიგში, ორი სახელმწიფოს ლიდერებს შორის კომუნიკაციას მოიცავს. მისივე ინფორმაციით, პუტინისა და ჩინეთის პრეზიდენტ სი ძინპინის შეხვედრა ვიწრო და გაფართოებულ ფორმატში გაიმართება. მაღალი დონის მოლაპარაკებების შემდეგ მხარეები რამდენიმე ხელშეკრულებასა და დოკუმენტს მოაწერენ ხელს. ამის შემდეგ ლიდერები ერთობლივი განცხადების გამოქვეყნებას და პრესასთან საუბარს გეგმავენ.

გარდა ამისა, დაგეგმილია პუტინისა და ჩინეთის სახალხო რესპუბლიკის სახელმწიფო საბჭოს პრემიერ-მინისტრის, ლი ჩიანგს შეხვედრა.

ცნობისთვის, ეს არის ვლადიმერ პუტინის პირველი საერთაშორისო ვიზიტი პრეზიდენტად ხელახლა არჩევის შემდეგ.