ისრაელის თავდაცვის მინისტრი, იოავ გალანტი პრემიერ-მინისტრ ბენიამინ ნეთანიაჰუს მოუწოდებს, საჯაროდ გამოაცხადის, რომ ისრაელი არ გეგმავს ღაზაში სამოქალაქო და სამხედრო მმართველობის აღებას.

„კიდევ ერთხელ უნდა გავიმეორო: არ დავთანხმდები ღაზაში ისრაელის სამხედრო მმართველობის დამყარებას. ასევე, ისრაელმა არ უნდა დაამყაროს სამოქალაქო მმართველობა ღაზაში. მოვუწოდებ პრემიერ-მინისტრ ბენიამინ ნეთანიაჰუს, მიიღოს გადაწყვეტილება და განაცხადოს, რომ ისრაელი არ დაამყარებს სამოქალაქო კონტროლს ღაზას სექტორზე, რომ ისრაელი არ დაამყარებს სამხედრო მმართველობას ღაზას სექტორში. ჩვენ უნდა გავანადგუროთ „ჰამასის“ მმართველობის შესაძლებლობები ღაზაში. ამ მიზნის გასაღები არის სამხედრო მოქმედება და ღაზაში მმართველი ალტერნატივის შექმნა“, - აღნიშნა გალანტმა.

მისი თქმით, ასეთი ალტერნატივის არარსებობის შემთხვევაში, რჩება მხოლოდ ორი უარყოფითი ვარიანტი: „ჰამასის“ მმართველობა ღაზაში ან ისრაელის სამხედრო მმართველობა ღაზაში.

გალანტმა აღნიშნა, რომ თავდაცვის უწყებამ ომის გეგმა მთავრობას ჯერ კიდევ იმ ღამით წარუდგინა, როდესაც ოქტომბერში ღაზაში ისრაელის სახმელეთო შეჭრა დაიწყო. მისი თქმით, გეგმები მოიცავდა წინადადებებს „საერთაშორისო აქტორების თანხლებით ადგილობრივი, არამტრული პალესტინური მმართველობის ალტერნატივის შექმნის შესახებ.“

გალანტის მტკიცებით, ეს წინადადებები არასოდეს ყოფილა განხილული და არც რაიმე ალტერნატივა ყოფილა წარმოდგენილი.