ნიდერლანდების ახალი სამთავრობო კოალიციის განცხადებით, იგი უკრაინის მხარდაჭერას გააგრძელებს, - ამის შესახებ ინფორმაციას სააგენტო Reuters-ი ავრცელებს.

ნიდერლანდების ახლად შექმნილმა სამთავრობო კოალიციამ, რომელსაც ხეერტ ვილდერსის თავისუფლების პარტია (PVV) ხელმძღვანელობს, მთავრობის გეგმა გამოაქვეყნა, რომელშიც აღნიშნულია, რომ ნიდერლანდები უკრაინის პოლიტიკურ და სამხედრო მხარდაჭერას გააგრძელებს.

ასევე, მთავრობის გეგმაში ნათქვამია, რომ კოალიცია ნატო-სთან შეთანხმების შესაბამისად, თავდაცვაზე მთლიანი შიდა პროდუქტის მინიმუმ 2%-ს დახარჯავს.

გარდა ამისა, ნიდერლანდების ოთხპარტიული კოალიცია აცხადებს, რომ იგი საზღვრებზე კონტროლს გააძლიერებს და ქვეყანაში თავშესაფრის მაძიებელთათვის წესებს გაამკაცრებს.

„რაც შეიძლება დიდი რაოდენობით, თუნდაც იძულებით დეპორტირდეს ადამიანები, რომლებსაც მოქმედი ბინადრობის ნებართვა არ აქვთ“, - ნათქვამია კოალიციური მთავრობის გეგმაში.

კოალიციაში შემავალი პარტიები ახლა იმაზე უნდა შეთანხმდნენ, თუ ვინ დაიკავებს ქვეყნის პრემიერ-მინისტრის თანამდებობას. ხეერტ ვილდერსმა უკვე განაცხადა, რომ იგი მოქმედ პრემიერ-მინისტრს, მარკ რუტეს არ შეცვლის.