საქართველოს მესამე პრეზიდენტის, მიხეილ სააკაშვილის განცხადებით, საქართველოს ჰიმნში რამდენიმე ტაეპი მისი დაწერილია. ამის შესახებ ის სოციალურ ქსელში წერს.

ამასთან, სააკაშვილის თქმით, სიტყვები "თავისუფლება დღეს ჩვენი" ყველაზე ზუსტად გამოხატავს ჩვენს გენეტიკურ კოდს.

„მინდა იცოდეთ, თუ საიდან წამოვიდა ჩვენი ჰიმნის იდეა. ასე 5 წლის ვიყავი, როცა დედაჩემს რუსთაველის გამზირით მივყავდი ინგლისურის გაკვეთილზე და ამ დროს შევესწარით ოპერის თეატრიდან ცნობილი ტენორის, დავით გამრეკელის გამოსვენებას.

მთელ რუსთაველზე დინამიკებში ჩართული იყო არია ზაქარია ფალიაშვილის დაისიდან „ოდა თავისუფლებას", დავით გამრეკელის შესრულებით. გულში ჩამივარდა ამ არიის სიტყვები "თავისუფლება დღეს ჩვენი". “ვარდების რევოლუციის” შემდეგ, როდესაც ჰიმნის შეცვლის საკითხი დადგა, მე კომისიას ეს მელოდია შევთავაზე. მალე ტექსტის პროექტიც მომიტანეს, რომელშიც ვერ ვიპოვე მთავარი სიტყვები "თავისუფლება დღეს ჩვენი", ამიტომ ჩემი ხელით ჩავწერე:

„თავისუფლება დღეს ჩვენი,

მომავალს უმღერს დიდებას;

დიდება თავისუფლებას,

თავისუფლებას დიდება".

ძალიან ვამაყობ, როდესაც ეს სიტყვები მრავალგზის გამეორებული მესმის მოედნებზე და ქუჩებში. არასდროს დამიწერია ეს, მაგრამ ახლა მინდა, რომ იცოდეთ. ვინაიდან ჩემი ღრმა რწმენით, სწორედ სიტყვები "თავისუფლება დღეს ჩვენი" ყველაზე ზუსტად გამოხატავს ჩვენს გენეტიკურ კოდს“, - წერს მიხეილ სააკაშვილი.