ევროკავშირის მხრიდან ყველაზე ცუდი შეცდომა იქნებოდა საქართველოს მთავრობასთან ამ კანონპროექტში შესწორებებზე მოლაპარაკებების დაწყება, - ამის შესახებ გერმანიის პარლამენტის (ბუნდესტაგის) საგარეო საქმეთა კომიტეტის თავმჯდომარემ, მაიკლ როთმა გერმანულ გამოცემა Vorwärts-თან ინტერვიუში განაცხადა.

„როდესაც საქართველოს გასული წლის დეკემბერში კანდიდატის სტატუსი მიენიჭა, ევროკომისიის მიერ განსაზღვრული 12 პირობა იყო. ამ მომენტისთვის მათგან არც ერთი არ შესრულებულა. პირიქით, კონკრეტული უკან გადადგმული ნაბიჯები არის. პრეზიდენტმა [ზურაბიშვილმა] ეს შეხვედრაზე დაგვიდასტურა. ჯამში, საქართველოს პოლიტიკური მიმართულება სწორი არ არის…

საქართველოს მთავრობამ ამ მომენტისთვის ევროკავშირში კარი დახურა. მაგრამ ეს კარი შეიძლება ნებისმიერ დროს ხელახლა გაიღოს, თუ ეს კანონი გაწვეული იქნება. შესაბამისად, დემონსტრანტებს თბილისში ახლა ჩვენი გამხნევება და სოლიდარობა სჭირდებათ.

მასობრივი პროტესტების მიუხედავად, არა მგონია შეუძლებელი იყოს, რომ ოქტომბერში „ქართულმა ოცნებამ” კიდევ ერთხელ მოიგოს არჩევნები და მთავრობის ფორმირება გააგრძელოს. სამწუხაროდ, ოპოზიცია ძალიან დაყოფილი და სუსტ მდგომარეობაშია…

პარლამენტში ჩემი ყოფნის 26 წლის განმავლობაში, არასდროს არ შემხვედრია მთავრობა, რომელსაც სრული უარი ეთქვა საუბარზე. [საქართველოს] პარლამენტში ჩვენი შეშვების ნაცვლად, [პარლამენტის საგარეო საქმეთა] კომიტეტის თავმჯდომარეს მმართველი პარტიიდან “ქართული ოცნების” სათავო ოფისში შევხვდით დისკუსიისთვის. მან გვითხრა, მაგალითად, რომ სალომე ზურაბიშვილი საქართველოს პრეზიდენტი არ არის, არამედ ოპოზიციის პრეზიდენტია, და მისი მიზანი მთავრობის დამხობა.

ყველაზე ცუდი შეცდომა, რომელიც ევროკავშირმა შეიძლება დაუშვას, არის საქართველოს მთავრობასთან კანონში კონკრეტულ ცვლილებებზე მოლაპარაკებების წარმოება. ეს კანონის პრინციპულ დონეზე მიღების ნიშანი იქნება. ამის ნაცვლად, პოზიცია ნათელი უნდა იყოს: ეს კანონი გაწევრიანების შესახებ მოლაპარაკებების დასაწყებად გამოყენებული ვერ იქნება. ეს ნიშნავს, რომ საქართველოს გაწევრიანების სტატუსს არანაირი წონა აღარ ექნება. ეს სერიოზული დარტყმა იქნება ქვეყნისთვის, რომელიც არც ისე დიდი ხნის წინ სამაგალითო იყო, როდესაც საქმე ევროკავშირთან დაახლოებას ეხებოდა.

მაგრამ ასევე არ მჯერა მთავრობის კურსისთვის მოსახლეობის დასჯის. ჩემი აზრით, ზოგიერთი ადამიანის იდეა საქართველოსთვის ვიზალიბერალიზაციის შეჩერების შესახებ სერიოზული შეცდომა იქნება. საქართველოში ახალგაზრდა ხალხი, განსაკუთრებით, ამის ფასს გადაიხდის. იმედი უნდა მივცეთ, რომ ევროპაში კარი ღია დარჩება თუ საქართველოს მთავრობა მის „საქანელა“ პოლიტიკას შეწყვეტს ევროკავშირსა და რუსეთს შორის”, - განაცხადა როთმა.