სტუ - საქართველოს ტექნიკური უნივერსიტეტი “ტვ ფორმულას” და ვანო მაჭავარიანს ცილისმწამებლური განცხადებების გავრცელებისთვის ბოდიშის მოხდას სთხოვს

საქართველოს ტექნიკური უნივერსიტეტი ვანო მაჭავარიანის მიერ „ტვ ფორმულას“ ეთერში, გადაცემაში - „კომენტარი სოფო ზურაბიანთან ერთად“, გაკეთებულ განცხადებებს ეხმაურება და გადაცემის წამყვანისა და მისი რესპონდენტისგან ბოდიშის მოხდას ითხოვს.

უნივერსიტეტის მიერ გავრცელებულ განცხადებაში აღნიშნულია, რომ გადაცემის წამყვანმა და ვანო მაჭავარიანმა რექტორის, აკადემიკოს დავით გურგენიძის და შესაბამისად, უნივერსიტეტის დისკრედიტაციისკენ მიმართული ცილისმწამებლური განცხადებები გააჟღერეს და საზოგადოების შეცდომაში შეყვანა სცადეს.

„საქართველოს ტექნიკური უნივერსიტეტის ადმინისტრაციულ შენობასთან, 16 მაისს, დილის საათებში, ახალგაზრდების ერთმა ჯგუფმა საპროტესტო აქცია გამართა. აქციის მსვლელობისას, სტუდენტებთან შეხვედრის მიზნით, უნივერსიტეტის რექტორმა, აკადემიკოსმა დავით გურგენიძემ სამუშაო გრაფიკი შეცვალა და ადმინისტრაციის წარმომადგენლებთან ერთად სტუდენტებს შეხვდა.

საქართველოს ტექნიკური უნივერსიტეტის რექტორმა სტუდენტებს განუმარტა, რომ უნივერსიტეტისთვის ფუნდამენტურად ღირებულია დემოკრატიის პრინციპები და გამოხატვის თავისუფლების გარანტირება. უნივერსიტეტი თვლის, რომ ნებისმიერ აქციაში მონაწილეობა სტუდენტების ან პედაგოგების პირადი გადაწყვეტილება და პასუხისმგებლობაა. ამასთანავე, უნივერსიტეტი ვალდებულია სასწავლო პროცესი განავითაროს, რადგან სამოქალაქო აქტივობასთან ერთად, სტუდენტების უმრავლესობა ლექციებს ესწრება.

რექტორის ჯანსაღი, დემოკრატიული და სახელმწიფოებრივი პოზიცია მიუღებელი აღმოჩნდა გარკვეული პოლიტიკური ჯგუფისთვის, რისი გამოვლინებაც იყო ვანო მაჭავარიანის „ტვ ფორმულას“ ეთერში გაკეთებული ცილისმწამებლური განცხადებები. სამწუხაროდ, გადაცემის წამყვანი სოფო ზურაბიანი აღმოჩნდა მხარე და სტუმრის მსგავსად, ისიც მტკიცებით ფორმაში, დამცინავი და შეურაცხმყოფელი ტონით მოიხსენიებდა რექტორს და უნივერსიტეტს.

ვანო მაჭავარიანმა ცილი დასწამა დავით გურგენიძეს და განაცხადა, რომ საქართველოს ტექნიკურ უნივერსიტეტში სწავლის პერიოდში, დავით გურგენიძე მას თითქოს „სდევნიდა და კაბინეტში იბარებდა“. ნათქვამის ჭეშმარიტებაში გადაცემის წამყვანის, მაყურებლის და სტუდენტების დასარწმუნებლად, მან ზემოთ თქმულს კიდევ ერთი ტყუილი მიაყოლა, რომ დავით გურგენიძემ უმაღლესი განათლება კუიბიშევში მიიღო.

ვანო მაჭავარიანი, სიცრუის ტირაჟირებითა და საზოგადოების გამიზნულად შეცდომაში შეყვანით, ცდილობდა ქვეყანაში არსებული სიტუაცია მეტად გაემძაფრებინა. განათლებულობაზე პრეტენზიის მქონე ადამიანისგან მეტად გასაოცარია, როცა მან ახალგაზრდებს განუცხადა - თურმე დღეს სწავლა-სწავლების პროცესი რუსული გავლენაა და სტუდენტებმა არ უნდა დაუჯერონ რექტორს!

სამწუხაროდ, ჟურნალისტმა არ დასვა შეკითხვა - თუ გურგენიძე კუიბიშევში სწავლობდა, ხოლო მაჭავარიანი საქართველოს ტექნიკურ უნივერსიტეტში (იმჟამინდელი საქართველოს პოლიტექნიკური ინსტიტუტი), როგორ მოახერხა გურგენიძემ მაჭავარიანის „კაბინეტში დაბარება“. ჟურნალისტი ასევე არ დაინტერესდა, საჭიროების შემთხვევაში ვანო მაჭავარიანს შეუძლია თუ არა, სათანადო მტკიცებულებები წარმოადგინოს და ინტერვიუში ნათქვამი დაადასტუროს.

საქართველოს ტექნიკური უნივერსიტეტი ეყრდნობა გამჭვირვალობის პრინციპებს, ყოველთვის ღიაა და მზად არის საზოგადოებასთან კონსტრუქციული დიალოგისთვის, მით უმეტეს, რომ საზოგადოებისთვის კარგად არის ცნობილი რექტორის მოღვაწეობის შესახებ მის ყველა ეტაპზე და ყველა კითხვაზე არგუმენტირებული პასუხია გაცემულიდა ბატონ ვანო მაჭავარიანსაც მოვუწოდებთ იმოქმედოს გამჭვირვალობის დაცვით - გაიხსენოს მისი „საქმიანობის“ დეტალები საბჭოთა თუ შემდგომ პერიოდებში, მათ შორის, სტუდენტობის წლებში თავისი კომკავშირთან ურთიერთობა!

საქართველოს ტექნიკური უნივერსიტეტი გადაცემაში - „კომენტარი სოფო ზურაბიანთან ერთად“, ჟურნალისტ სოფო ზურაბიანის მხარდაჭერით, ვანო მაჭავარიანის მხრიდან სამიზნე ჯგუფისთვის (სტუდენტებისთვის) გაჟღერებულ ცილისმწამებლურ განცხადებებს რექტორის პატივის, ღირსების და საქმიანი რეპუტაციის შელახვისა და უნივერსიტეტის დისკრედიტაციის, სწავლა-სწავლების პროცესის ჩაშლის მცდელობად აღიქვამს და ტელეკომპანიას, ასევე, ვანო მაჭავარიანს საჯაროდ ბოდიშის მოხდას სთხოვს“, - აღნიშნულია სტუ-ის განცხადებაში.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ბორის სოკოლოვი - რუსეთისთვის ჩინურ იუანზე ორიენტაცია სახიფათოა, რადგან, ჩინურ ხელისუფლებას საკუთარი შეხედულებისამებრ შეუძლია იუანის კურსის დადგენა, სამწუხაროდ, ომი უკრაინაში 2024 წელს არ დასრულდება
შექმენი შენზე მორგებული კომბინაცია მობილური პაკეტით „მეტი“
„ბრიტანულ-ქართული აკადემიის“ დირექტორის, ნათია ჯანაშიას ადვოკატმა სს „საქართველოს კაპიტალის“ და შპს „საქართველოს განათლების ჯგუფის“ დირექტორების წინააღმდეგ პროკურატურას სარჩელით მიმართა
„არქიმ“ და „დელოიტმა“ აუდიტის მომსახურების ხელშეკრულება გააფორმეს
ისრაელის ელჩი ჰადას მეიცადი - ის, ვინც იწყებს ომს და შემდეგ აგებს, არ არის მსხვერპლი