ვატო სურგულაძე - დღევანდელი პროტესტი არის იმის გამო, რომ ქვეყანა დადგა ყოფნა-არყოფნის წინაშე - ვინმეს არ ეგონოს ექიმები ჩუმად არიან, ჩვენც აქ ვართ და ჩვენც იგივე მოთხოვნა გვაქვს, რაც საქართველოს უმრავლესობას

დღევანდელი პროტესტი არის იმის გამო, რომ ქვეყანა დადგა ყოფნა-არყოფნის წინაშე. ვინმეს არ ეგონოს ექიმები ჩუმად არიან, ჩვენც აქ ვართ და ჩვენც იგივე მოთხოვნა გვაქვს, რაც საქართველოს უმრავლესობას, - ამის შესახებ პარტია „ლელოს“ წევრმა, ვატო სურგულაძემ ჟურნალისტებს განუცხადა.

როგორც სურგულაძემ აღნიშნა, „თუ ყველამ, ექიმებმა, მეხანძრეებმა, დასუფთავების მუშაკებმა ხმა არ ამოვიღეთ, ერთ დღეს გავიღვიძებთ ქუთაისის და თბილისის გუბერნიაში“.

„დღეს აქ შეკრებილები არიან სხვადასხვა კლინიკების ექიმები, ექთნები, ექიმი-რეზიდენტები იმიტომ, რომ ქვეყანა რეალურად დგას ყოფნა-არყოფნის წინაშე. [პროტესტს გამოვხატავთ] არა მარტო ამ კანონის, არამედ, სახელმწიფოს დამოკიდებულების მიმართ მთლიანად ჯანდაცვის სექტორისადმი… პრაქტიკულად, სრულად განადგურებულია განათლება. ერთადერთი სახელმწიფო ვართ მსოფლიოში, როდესაც რეზიდენტი, რომელიც ცოდნას იღებს და უნდა გახდეს სრულყოფილი ექიმი, იხდის ფულს. პირიქით უნდა ხდებოდეს, აქეთ უნდა უხდიდნენ რეზიდენტს ფულს რომ ის სწავლობს და ექიმი უნდა გახდეს. ეს შესაცვლელია! ასევე ბევრი რამ არის შესაცვლელი, ძალიან ბევრი კლინიკა დადგა გაკოტრების წინაშე არასწორი პოლიტიკის გამო, არასწორი დამოკიდებულების გამო. რამდენიც უნდა ცვალონ მინისტრები, ეს შედეგს არ მოიტანს, თუ სისტემური ცვლილებები არ იქნება. დღევანდელი პროტესტი არის იმის გამო, რომ ქვეყანა დადგა ყოფნა-არყოფნის წინაშე. თუ ყველამ, ექიმებმა, მეხანძრეებმა, დასუფთავების მუშაკებმა ხმა არ ამოვიღეთ, ერთ დღეს მართლა გავიღვიძებთ ქუთაისის და თბილისის გუბერნიაში. ჩვენი დღევანდელი პროტესტი ეხება ყველაფერს - ეხება ამ კანონს პირველ რიგში და რა თქმა უნდა, იმას, რომ იღუპება სამედიცინო სექტორი. ჩვენი მედიცინა დღითიდღე უკან მიდის. ეს არის გლობალური პროტესტი არსებული მდგომარეობის წინააღმდეგ. პროტესტს გამოვხატავთ იმიტომ, რომ ვინმეს არ ეგონოს ექიმები ჩუმად არიან. ჩვენც აქ ვართ, ჩვენც ქართველ ხალხთან ვართ და ჩვენც იგივე მოთხოვნა გვაქვს, რაც საქართველოს უმრავლესობას“, - განაცხადა ვატო სურგულაძემ.

ცნობისთვის, 9 აპრილის სკვერში „თერთხალათიანები“ - ექიმები, ექთნები, რეზიდენტები იკრიბებიან.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024