ხარკოვის ოლქში, რუსეთის მიერ განხორციელებული დარტყმების შედეგად მშვიდობიან მოსახლეობაში გამოწვეული მსხვერპლის გამო, 20 მაისი გლოვის დღედ გამოცხადდა, - ამის შესახებ ხარკოვის საოლქო-სახელმწიფო ადმინისტრაციის ხელმძღვანელი, ოლეგ სინეგუბოვი „ტელეგრამზე“ წერს.

„20 მაისი ხარკოვის ოლქში გლოვის დღეა. ოკუპანტებმა კუპიანსკის სოფლების : კოვშაროვკას, ნოვოოსინოვოს და მალოდანილოვსკის თემის დაბომბვის შედეგად 11 ადამიანის სიცოცხლე შეიწირეს. დაღუპულთა შორის არის ორსული ქალი“, - წერს გუბერნატორი.

ამასთან, ხარკოვის საოლქო პროკურატურის ინფორმაციით, თავდასხმის შედეგად, ხარკოვის რაიონში 6 ადამიანი დაიღუპა და 28 დაშავდა. კუპიანსკის რაიონში კი 5 ადამიანი დაიღუპა და 10 დაშავდა.