თუ ჩვენს სტრატეგიულ პარტნიორს იმის სურვილი აქვს, რომ უვიზო მიმოსვლა იყოს, თავისუფალი ვაჭრობა, პირდაპირი ფრენები, რა თქმა უნდა, ღია ვართ და მივესალმებით ამ ყველაფერს - ბურთი მათ მხარეს არის,- ამის შესახებ „ქართული ოცნების“ გენერალურმა მდივანმა, კახა კალაძემ განაცხადა, რომელიც გამოცემა Politico-ს მიერ გავრცელებული ინფორმაციას გამოეხმაურა.

როგორც მან აღნიშნა, „ქართული ოცნების“ პოლიტიკური საბჭოს განცხადებაც მკაფიო დასტურია, „რომ თუ ვინმეს რაიმეს გაკეთება უნდა, არავის აქვს წინააღმდეგობა“.

„მინდა ხაზი გავუსვა, თუ რატომ იყო მნიშვნელოვანი „უცხოური გავლენის გამჭვირვალობის შესახებ" კანონი. ბოლო წლებში, არაერთი რევოლუციის მცდელობა ვნახეთ, არასამთავრობო ორგანიზაციების ჩართულობით, მოწოდებები და განცხადებები, არასამთავრობო ორგანიზაციების მხრიდან, რომ მთავრობა უნდა გადადგეს. წარმოუდგენელია, ნორმალურ ქვეყანაში არასამთავრობო ორგანიზაცია კადრულობდეს იმას, რასაც საქართველოში აკეთებენ. ასევე ვისი დაფინანსებით ხდება ეს ყველაფერი, ვინ არის დონორი. გამჭვირვალობა მნიშვნელოვანია, რათა საზოგადოებამ იცოდეს ვისგან ფინანსდებიან და რა პროექტში იხარჯება თანხები. ასევე გვიწევს თავის და ქვეყნის დაცვა იმ განცხადებებისგან, რომელიც დასავლეთიდან მოდის, აბსოლუტურად აცდენილია რეალობას, შეურაცხმყოფელია. რა თქმა უნდა, ჩვენი მხრიდან პასუხებია. თუ ჩვენს სტრატეგიულ პარტნიორს იმის სურვილი აქვს, რომ უვიზო მიმოსვლა იყოს, თავისუფალი ვაჭრობა, პირდაპირი ფრენები, რა თქმა უნდა, ღია ვართ და მივესალმებით ამ ყველაფერს. არ უნდა დარჩეს უბრალო სიტყვებად, კონკრეტული ნაბიჯები გადაიდგას. ასევე ის შანტაჟი, რომელიც ევროკავშირის მოლაპარაკებების გახსნასთან დაკავშირებით ხდება მიუღებელია. გადაიდგას კონკრეტული ნაბიჯები.

ჯერ არავინ იცის, ინიციირებული კანონპროექტი სად იქნება და რა დონემდე მივა. თუ კონკრეტულ ნაბიჯებს დავინახავთ, ეს შეუძლიათ გადადგან. როგორც კი კონკრეტულ ნაბიჯებს დავინახავთ, კანონის აუცილებლობა გამჭვირვალობის შესახებ აუცილებელი არ იქნება. ეს კანონპროექტი სადავო თემა არ არის.

ვიზალიბერალიზაცია, სავაჭრო ურთიერთობები, პირდაპირი ფრენები და ევროპასთან მოლაპარაკებების გახსნა - თუ დავინახავთ, რომ კონკრეტული ნაბიჯები იდგმება ამ მიმართულებით, ეს იქნება იმის მანიშნებელი, რომ სურვილია ურთიერთობები დალაგდეს, ისეთი იყოს, როგორც პარტნიორებს შეესაბამება, თუ ეს ყველაფერი გაკეთებული იქნება კანონის აუცილებლობა არ იქნება.

ბურთი მათ მხარეს არის. მთელი ამ ხნის განმავლობაში, ვერ მოიყვანთ მაგალითს, რომ ჩვენ რაიმე არასწორი გაგვეკეთებინოს, ისეთი ნაბიჯი გადაგვედგას, რომელიც რუსულ ინტერესში შედიოდეს“,- აღნიშნა კალაძემ.

ცნობისთვის, Politico -ს ინფორმაციით, აშშ საქართველოსთვის მნიშვნელოვანი სამხედრო, სავაჭრო პაკეტის გადაცემასა და სავიზო რეჟიმის ლიბერალიზაციას განიხილავს, თუ ანტიდემოკრატიული კურსი შეიცვლება.