ზუგდიდის რაიონული სასამართლომ სენაკში, გორის ქუჩაზე მომხდარი მკვლელობისთვის დაკავებულ 21 წლის მამაკაცს აღკვეთის ღონისძიების სახით პატიმრობა შეუფარდა.

აღნიშნული გადაწყვეტილება მოსამართლე შოთა ბიჭიამ მიიღო , რითაც სრულად დააკმაყოფილა ბრალდების მხარის შუამდგომლობა.

ბრალდებულმა სხდომაზე განაცხადა, რომ თავს დამნაშავედ არ ცნობს.

დაკავებულის ადვოკატმა როლანდ შონიამ აღნიშნა, რომ საქმეში არასაკმარისი მტკიცებულებები დევს , რის გამოც მან აღკვეთის ღონისძიების გაუქმება მოითხოვა და სასამართლოს 150 000 ლარის ღირებულების გირაოს გადახდა შესთავაზა. მოსამართლემ მისი შუამდგომლობა არ გაითვალისწინა.

წინასასამართლო სხდომა 10 ივლისს ჩაინიშნა.

შეგახსენებთ, რომ მკვლელობა სენაკში, გორის ქუჩაზე 19 მაისს მოხდა. ე.წ. კრიმინალურ გარჩევაში ათამდე ადამიანი მონაწილეობდა, 25 წლის მამაკაცი მოკლეს , რამდენიმე პირი კი დაიჭრა.