იაგო კაჭკაჭიშვილი - „ქართულმა ოცნებამ“ საბოლოოდ გადაწყვიტა, რკინის ფარდა ჩამოაფაროს - ბრიფინგზე გამოიყვანეს უცნობი ადამიანი, რომელსაც დეპუტატებიც კი არ იცნობენ, ეს არის ჟესტი, აბუჩად აიგდეს ავტორიტეტული ორგანო

„ქართულმა ოცნებამ“ საბოლოოდ გადაწყვიტა, რომ რკინის ფარდა ჩამოაფაროს მასა და საერთაშორისო საზოგადოებას შორის, - ამის შესახებ სოციოლოგმა იაგო კაჭკაჭიშვილმა „პლიტრანიუსის გადაცემაში „პოლიტიკური სივრცე“ განაცხადა, რითაც „ქართული ოცნების“ ოფისში „უცხოური გავლენის გამჭვირვალობის შესახებ“ კანონპროექტის შესახებ ვენეციის კომისიის დასკვნასთან დაკავშირებით გამართულ ბრიფინგს გამოეხმაურა.

იაგო კაჭკაჭიშვილის განცხადებით, ხელისუფლებამ გადაწყვიტა, რომ წავიდეს „ვა-ბანკზე“ , ანუ „წავიდეს ავტორიტარიზმის გამყარების მიმართულებით“.

„ხელისუფლების რეაქცია ადვილად პროგნოზირებადი იყო, იმიტომ, რომ ამ ტიპის რეზისტენტულობა უკვე გამოამჟღავნა პრაქტიკულად ყველა საერთაშორისო ორგანიზაციამ, ყველა ევროპულმა ქვეყანამ, აშშ-მა. არც კი მახსოვს რომელიმე ერთი ავტორიტეტული ორგანიზაცია მაინც, რომელსაც დაეცვას ამ კანონის შემოტანა. ხელისუფლებამ, როგორც ჩანს, გადაწყვიტა, რომ წავიდეს „ვა-ბანკზე“ ანუ წავიდეს თავისი ავტორიტარიზმის გამყარების მიმართულებით ყოველგვარი ლეგიტიმური ბარიერის მოხსნით. ეს დასკვნები და მათ შორის ვენეციის კომისიის დასკვნა რასაკვირველია ხელისუფლების გასაგონადაა ნათქვამი, მაგრამ თუ ხელისუფლება ყრუა და არ ესმის, მაშინ ამ დასკვნასაც მისთვის არანაირი აზრი არ აქვს, მაგრამ ძალიან მნიშვნელოვანია საზოგადოებამ მოისმინოს ეს დასკვნა, იმიტომ, რომ შესაძლოა საზოგადოებაში არსებობენ ადამიანები, რომლებიც ჯერ კიდევ ჭოჭმანობენ, ფიქრობენ, რომ არ ჩატარებულა ობიექტური ექსპერტიზა. მათთვის ეს ძალიან მნიშვნელოვანი არგუმენტი იქნება. საზოგადოებაში ამ კანონის საწინააღმდეგო განწყობების გასაძლიერებლად და პროტესტის მობილიზაციისთვის ეს მნიშვნელოვანია.

როგორც ჩანს, „ქართულმა ოცნებამ“ საბოლოოდ გადაწყვიტა, რომ რკინის ფარდა ჩამოაფაროს მასა და საერთაშორისო საზოგადოებას შორის. შემიძლია პირდაპირ ვთქვა, არ მომერიდება, ჩვენ ვხედავთ იმ უტიფრობას, რასაც „ქართული ოცნება“ და ხელისუფლება ამჟღავნებს საერთაშორისო ორგანიზაციების, ჩვენი სტრატეგიული პარტნიორების მიმართ. ბრიფინგზე გამოიყვანეს ყველასთვის უცნობი ადამიანი, რომელსაც მე მგონი ამ წლების განმავლობაში ხმა საერთოდ არ ამოუღია, არავინ არ ვიცნობთ. დეპუტატებიც კი არ იცნობენ. ეს არის ჟესტი, აბუჩად აიგდეს ასეთი ავტორიტეტული ორგანო“, - განაცხადა იაგო კაჭკაჭიშვილმა.

ინფორმაციისთვის, ვენეციის კომისია “უცხოური გავლენის გამჭვირვალობის შესახებ” კანონპროექტის გაწვევის „მკაცრ რეკომენდაციას” გასცემს.

ვენეციის კომისიის დასკვნას „ქართული ოცნების“ ოფისში გამართულ ბრიფინგზე, უმრავლესობის წევრი, სალომე ქურასბედიანი გამოეხმაურა.

ქურასბედიანის განცხადებით, „ვენეციის კომისიის პლატფორმა გამოიყენეს მიკერძოებული პოლიტიკური შეფასებების გასაკეთებლად, ნაცვლად პროფესიული მსჯელობისა, რაც ისევ და ისევ ვენეციის კომისიის რეპუტაციას აზიანებს“.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
„დაგროვებითი პენსიის შესახებ“ კანონში ცვლილებები შედის - რა სიახლეებს უნდა ელოდონ საპენსიო სქემის მონაწილეები
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
როგორ ვებრძოლოთ მოგზაურთა დიარეას
„სიმეტრია პარკი“ მთაწმინდის რაიონში კომერციული ფართის მშენებლობის დასრულებას აანონსებს
ISET-ის ფინანსების სამაგისტრო პროგრამამ CFA ინსტიტუტთან აფილირება მიიღო
„ბიზნეს ოსკარად“ წოდებული „ოქროს ბრენდის“ დაჯილდოებაზე PSP კვლავ N1 ფარმაცევტულ ბრენდად აღიარეს
ქართული პრესის მიმოხილვა 20.06.2024