ქვემო ქართლში სახელმწიფო რწმუნებულის ადმინისტრაციაში, გაერთიანებული წყალმომარაგების კომპანიის ხელმძღვანელებთან შეხვედრა გაიმართა.

აღნიშნულის შესახებ ინფორმაციას ქვემო ქართლში სახელმწიფო რწმუნებულის ადმინისტრაცია ავრცელებს.

მათივე ცნობით, შეხვედრას, ქვემო ქართლში სახელმწიფო რწმუნებული გიორგი დოხტურიშვილი, მარნეულის მუნიციპალიტეტის მერი კენან ომაროვი და საკრებულოს თავმჯდომარე, ამირან გიორგაძე ესწრებოდნენ.

„საუბარი შეეხო მარნეულის მუნიციპალიტეტში წყლის ინფრასტრუქტურის რეაბილიტაციასთან დაკავშირებულ გამოწვევებს.

შეგახსენებთ, რომ მარნეულში ისტორიული პროექტი ხორციელდება, რომელიც 22 000 ბენეფიციარის 24 საათიანი უწყვეტი წყალმომარაგებით უზრუნველყოფას გულისხმობს. თუმცა, რამდენიმე ლოკაციაზე შეფერხებით მიმდინარეობს სამუშაოები, დაზიანებულია გზის საფარი, რაც გადაადგილებასთან დაკავშირებით ქმნის პრობლემებს.

რწმუნებულმა, საუბრისას აღნიშნა, რომ გამოწვევა, რომლის წინაშეც მარნეულის მოსახლეობა დგას, უმოკლეს ვადაში უნდა გადაიჭრას.

შეხვედრას ქვემო ქართლში სახელმწიფო რწმუნებულის მოადგილე, ილია ჯალაღანია, მარნეულის მუნიციპალიტეტის მერის პირველი მოადგილე, როინ დეკანოიძე და წყალმომარაგების კომპანიის წარმომადგენლები ესწრებოდნენ“, - აღნიშნულია ინფორმაციაში.