მამუკა ხაზარაძე - „ქართული ოცნება” ოფიციალურად მოექცა სრულ საერთაშორისო იზოლაციაში - მოვუწოდებ დიპლომატებს, დაუყოვნებლივ გადადგით ღირსეული ნაბიჯი, რაც არის რუსეთის მსახური ხელისუფლების მხილება - გააჩერეთ რუსული კანონი!
„ლელოს“ ლიდერის მამუკა ხაზარაძის განცხადებით, “ქართული ოცნება” ოფიციალურად მოექცა სრულ საერთაშორისო იზოლაციაში.
ასე გამოეხმაურა ის აშშ-ის მიერ საქართველოში „დემოკრატიისთვის ძირის გამოთხრაში პასუხისმგებელ ან თანამონაწილე პირებზე და მათი ოჯახის წევრებზე სავიზო შეზღუდვების პოლიტიკის“ გამოცხადებას.
როგორც ხაზარაძე აღნიშნავს, სახელმწიფო მდივნის მიერ დაწესებული სანქციები ქართველი ხალხის დასაცავად ამუშავდება.
„ქართული ოცნება” ოფიციალურად მოექცა სრულ საერთაშორისო იზოლაციაში. სახელმწიფო მდივნის მიერ დაწესებული სანქციები ქართველი ხალხის დასაცავად ამუშავდება, თუმცა რაც ყველაზე მნიშვნელოვანია, ჩვენი ყველაზე ძლიერი და ერთგული პარტნიორი, აშშ-საქართველოს ორმხრივი თანამშრომლობის გადახედვას იწყებს და თუ ეს პროცესი ასე გაგრძელდა „ოცნების” რუსული ხელისუფლების გამო, საქართველო დაკარგავს მილიარდობით დოლარის დახმარებას!
მინდა ხელახლა და კიდევ ერთხელ მოვუწოდო ყველა დიპლომატს, დაუყოვნებლივ გადადგით ერთადერთი ღირსეული ნაბიჯი, რაც არის რუსეთის მსახური ხელისუფლების მხილება და ქვეყნის გადარჩენა! გააჩერეთ რუსული კანონი!“- აღნიშნავს ხაზარაძე.
ცნობისთვის, აშშ-ის სახელმწიფო მდივნის, ენტონი ბლინკენის განცხადებით, სახელმწიფო დეპარტამენტი ახორციელებს საქართველოსთვის სავიზო შეზღუდვის ახალ პოლიტიკას, რომელიც გავრცელდება იმ პირებზე, რომლებიც პასუხისმგებლები ან თანამონაწილეები არიან საქართველოში დემოკრატიისთვის ძირის გამოთხრაში, ასევე მათი ოჯახის წევრებზე. ეს მოიცავს პირებს, რომლებიც პასუხისმგებლები არიან საქართველოში სამოქალაქო საზოგადოებისა და მშვიდობიანი შეკრების თავისუფლების აღკვეთაზე ძალადობის ან დაშინების კამპანიის გზით.
