მინდა მივმართო ჩვენს აფხაზ და ოს დებს და ძმებს, მხოლოდ ერთიან, ძლიერ და თავისუფალ საქართველოში შევძლებთ საკუთარი იდენტობის დაცვას და გაძლიერებას, -ამის შესახებ თავდაცვის მინისტრმა, ირაკლი ჩიქოვანმა დამოუკიდებლობის დღესთან დაკავშირებით სიტყვით გამოსვლისას განაცხადა.

მისი თქმით, დამოუკიდებელი, სუვერენული საქართველო მისი ყველა მოქალაქის თვითრეალიზების, განვითარებისა და ეკონომიკური კეთილდღეობის წინაპირობაა.

ირაკლი ჩიქოვანის განმარტებით, ასეთი საქართველო დაიმკვიდრებს თავის ღირსეულ ადგილს ევროპულ ოჯახში.

„სწორედ ერთიანი საქართველოა და არა ოკუპაციით გახლეჩილი სამშობლო კეთილი მომავლის საწინდარი. მტკიცედ მწამს, ჩვენ დავიბრუნებთ ერთმანეთს. კიდევ ერთხელ გილოცავთ საქართველოს დამოუკიდებლობის დღეს, გისურვებთ ჩვენი ქვეყნის გაერთიანებას და გაძლიერებას, ღმერთი იყოს ჩვენი სამშობლოს მფარველი“,-განაცხადა ჩიქოვანმა.

თავდაცვის მინისტრმა აღნიშნა, რომ საქართველოს დამოუკიდებლობა სხვადასხვა თაობის გმირების თავგანწირული ბრძოლის შედეგია.

„მინდა პატივი მივაგო ყველა იმ გმირს, რომელთაც სიცოცხლე შესწირეს ჩვენი ქვეყნის თავისუფლებასა და მსოფლიო მშვიდობის დაცვას. ქედს ვიხრი თითოეულის ხსოვნის წინაშე. მინდა განსაკუთრებული პატივისცემა გამოვხატო მათი ოჯახების მიმართ. თქვენ აღზარდეთ გმირები. დღევანდელი დღე მინდა მივულოცო ჩვენს სახელოვან ვეტერანებს, რომლებიც ღირსეულად იბრძოდნენ საქართველოსთვის და მისი უკეთესი მომავლისთვის. საქართველოს დამცველებო, თქვენი თავდადება ფასდაუდებელია. ვულოცავ და დიდ მადლობას ვუხდი ჩვენს დაჭრილ, დაშავებულ მებრძოლებს, რომელთა დაუმარცხებელი სული სამაგალითოა ყველა ჩვენგანისთვის“,-განაცხადა ჩიქოვანმა. მან რეკრუტებს მიმართა, რომ მათ ისტორიულ დღეს დადეს ფიცი და შემოუერთდნენ საქართველოს თავდაცვის ძალებს.

„მჯერა, ეს გადაწყვეტილება მუდამ იქნება თქვენი და თქვენი ოჯახების ერთ-ერთი ყველაზე საამაყო დღე. დარწმუნებული ვარ, პირნათლად მოიხდით თქვენს მხედრულ ვალს საქართველოს წინაშე. რეკრუტებო, თავდაცვის ძალები ერთი დიდი ოჯახია, რომელიც აერთიანებს საქართველოს ყველა მოქალაქეს და აქვს უზენაესი სახელმწიფოებრივი მიზანი, დაიცვას ჩვენი სამშობლო. დამოუკიდებლობის დღეს ვულოცავ ყველა იმ ადამიანს, ვინც თავისი შრომითა და მონდომებით ქმნის ჩვენი ქვეყნის ძლიერ და ნათელ მომავალს. ჩვენს ექიმებს, მასწავლებლებს, პოლიციელებს, უსაფრთხოების სამსახურის წარმომადგენლებს, საჯარო მოხელეებს, მეწარმეებს, ფერმერებს. ყველას, ვისაც თავისი წვლილი შეაქვს ჩვენი სახელმწიფოს მშენებლობასა და გაძლიერებაში. ყველანი ერთად ვაძლიერებთ დამოუკიდებელ, სუვერენულ საქართველოს, რაც მისი ყველა მოქალაქის თვითრეალიზების, განვითარებისა და ეკონომიკური კეთილდღეობის წინაპირობაა. ზუსტად ასეთი საქართველო დაიმკვიდრებს თავის ღირსეულ ადგილს ევროპულ ოჯახში“,-განაცხადა ჩიქოვანმა.