საქართველოს დამოუკიდებლობის დღისადმი მიძღვნილი საზეიმო ღონისძიებების ფარგლებში, გარემოს დაცვისა და სოფლის მეურნეობის სამინისტროს სსიპ ღვინის ეროვნული სააგენტო ქალაქ მცხეთაში წარმოდგენილია კონცეფციით - „საქართველო ღვინის სამშობლო“.

პრესსამსახურის ინფორმაციით, ღონისძიებაში 10-მდე ადგილობრივი ღვინის მწარმოებელი მონაწილეობს. წარმოდგენილია ქართული ღვინისა და ვაზის კულტურის ისტორიასა და ტრადიციებთან დაკავშირებული ვიზუალური და საინფორმაციო მასალა, მათ შორის, ქართლის რეგიონის ღვინისა და ვაზის ჯიშების მრავალფეროვნება; მოწყობილია „სომელიეს კუთხე“, სადაც კონკურსის „საუკეთესო სომელიე 2021-ის“ გამარჯვებული ჯაბა ძიმისტარაშვილი პროფესიულ დეგუსტაციას მართავს.

მცხეთაში გამართულ ღონისძიებას ღვინის ეროვნული სააგენტოს თავმჯდომარე ლევან მეხუზლა და თავმჯდომარის მოადგილე ზურაბ ვაჭარაძე ადგილობრივი ხელისუფლების წარმომადგენლებთან ერთად ესწრებიან.

„ჩვენი ქვეყნის ყველა მოქალაქეს ვულოცავ საქართველოს დამოუკიდებლობის დღეს. დამოუკიდებლობა არის უმთავრესი მონაპოვარი, რაც ჩვენი ქვეყნის განვითარების აუცილებელი პირობაა. საქართველოს ეკონომიკური გაძლიერებაში მნიშვნელოვანი წვლილი შეაქვს აგრარულ სექტორს, რომელშიც მევენახეობა-მეღვინეობის დარგს, 8 ათას წლიანი ისტორიის მქონე ქართულ ღვინოს განსაკუთრებული ადგილი უჭირავს. ისტორიული ქალაქის, მცხეთის სტუმრებს დღეს აქვთ შესაძლებლობა, დააგემოვნონ საქართველოს უნიკალური ღვინოები, გაეცნონ მის ისტორიას, ქართული მევენახეობა-მეღვინეობის დარგის თანამედროვე მიღწევებს და გამოწვევებს", - აღნიშნა ლევან მეხუზლამ.

ღონისძიების ფარგლებში, ქალაქის ცენტრში მოწყობილ მოედანზე მთელი დღის განმავლობაში მიმდინარეობს ქართული ღვინის გამოფენა-გაყიდვა; ბავშვებისთვის მოწყობილია გასართობ-შემეცნებითი სივრცე, იმართება საბავშვო და ადგილობრივი ფოლკლორული ანსამბლების კონცერტები; გამოფენილია სამხედრო ტექნიკა.

17.10 საათზე აფხაზეთის კაპელა შეასრულებს საქართველოს ჰიმნს.

ღონისძიება დღის ბოლოს გალა-კონცერტით დასრულდება.

გარემოს დაცვისა და სოფლის მეურნეობის სამინისტროს ორგანიზებით 26 მაისისადმი მიძღვნილი ღონისძიებები მცხეთაში, ზუგდიდსა და ოზურგეთში იმართება.