როგორც ერთი ოპოზიციონერი პოლიტიკოსი, ვგრძნობ პასუხისმგებლობას, რომ მოვახდინოთ ჩვენი ძალების მაქსიმალური კონსოლიდაცია, - ამის შესახებ „ერთიანი ნაციონალური მოძრაობის“ ფრაქციის თავმჯდომარემ თინათინ ბოკუჩავამ „ქართული ოცნების" მიერ ვეტოს დაძლევის შემდეგ განაცხადა.

როგორც ბოკუჩავამ პარლამენტის წინ მიმდინარე აქციაზე "ინტერპრესნიუსს" განუცხადა, დღეს, „ქართულმა ოცნებამ“ რუსეთსა და ევროპას შორის, რუსეთი აირჩია.

„დღეს ივანიშვილის დეპუტაციას ჰქონდა ბოლო შესაძლებლობა, რომ ხელი არ მოეწერა ქვეყნის ღალატზე, დამდგარიყო ისტორიის ნათელ მხარეს, მაგრამ დღესაც მათ არ გამოიყენეს ეს ბოლო შანსი და თავისუფლებასა და მონობას შორის მონობა აირჩიეს; რუსეთსა და ევროპას შორის, რუსეთი აირჩიეს და ამით ხელი მოაწერეს ქვეყნის ღალატს.

ჩემი აზრით, როგორც ერთი ოპოზიციონერი პოლიტიკოსი, ვგრძნობ პასუხისმგებლობას, რომ მოვახდინოთ ჩვენი ძალების მაქსიმალური კონსოლიდაცია, რადგან ამხელა გამოწვევის წინაშე, ევროპული გამოწვევის წინაშე, დღეს საზოგადოების მთავარი დაკვეთა რუსული მთავრობის გასტუმრებასთან ერთად არის ოპოზიციურ ფრონტზე ერთობა", - განაცხადა ბოკუჩავამ.