დღეს ოფიციალურად მომივიდა ბოიკოტის წერილი რამდენიმე ფრაქციისა და პოლიტიკური ჯგუფისგან - ისინი ბოიკოტს უცხადებენ 9 პუნქტთან დაკავშირებული კანონპროექტების მიღებას. ეს მათი მავნებლობის კიდევ ერთი მხილებაა, - ამის შესახებ პარლამენტის თავმჯდომარემ, შალვა პაპუაშვილმა ჟურნალისტებთან საუბრისას განაცხადა.

მისი თქმით, ბოიკოტის შესახებ მიმართვა სავარაუდოდ, ყველასგან შევა.

„ბოიკოტს უცხადებენ 9 პუნქტთან დაკავშირებული კანონპროექტების მიღებას. ამაზე მეტი რაღა უნდა ვთქვათ ან ოპოზიციაზე, ან მათ სიმბიოზ NGO-ებზე, რომლებსაც თითი თითზე არ დაუკარებიათ ამ ქვეყნის ევროპული მომავლისთვის არასდროს, არც ხელისუფლებაში ყოფნის დროს და არც ოპოზიციაში ყოფნის დროს. ეს მათი მავნებლობის კიდევ ერთი მხილებაა,“ - განაცხადა პაპუაშვილმა.

გარდა ამისა, მან „უცხოური გავლენის გამჭვირვალობის შესახებ“ კანონზე ოპოზიციის განცხადებების შესახებ დასმულ კითხვას უპასუხა და აღნიშნა, რომ „რადიკალურ ოპოზიციას არანაირი საკუთარი ნება არ გააჩნია და სრულად გარედან იმართება“.

„ოპოზიციის ბაქი-ბუქი ხშირად გაგვიგია. ისინი ამ პარლამენტში შემოსვლასაც არ აპირებდნენ, ყველაფერი დაიფიცეს, რაც კი დასაფიცარი ჰქონდათ და ვნახეთ, რომ შემოვიდნენ კი არა, აქედან გასვლაც აღარ უნდათ. მე მგონი, ამ დღეებში მათ ნახეს ერთ-ერთი მთავარი რამ - როდესაც ისინი არ დგანან ხალხის მხარეს და არიან უცხოეთის, სხვა ქვეყნების იმედზე, რა თქმა უნდა, ისინი ყოველთვის დამარცხდებიან ხალხის წინაშე. ის რაც არის ხალხის ნება, ის უნდა შეასრულოს საქართველოს პარლამენტმა, მათ ამისთვის აქვთ მანდატი, რომ საკუთარი ამომრჩევლები წარმოადგინონ პარლამენტში და ამ ნებით იმოქმედონ. ამ სამი თვის განმავლობაში ოპოზიცია და მათთან დაკავშირებული NGO-ები სრულად მოქმედებდნენ უცხოეთიდან მიღებული გარკვეული ტონის მიხედვით. რა განცხადებასაც მოისმენდნენ, ზუსტად ისე იქცეოდნენ,“ - განაცხადა პაპუაშვილმა.