ოზურგეთის საკრებულოს სხდომაზე ხმაური იყო

ოზურგეთის საკრებულოს სხდომაზე ხმაური იყო. ერთმანეთს „ ქართული ოცნებისა და „ ერთიანი ნაციონალური მოძრაობის“ დეპუტატები დაუპირისპირდნენ.

დაპირისპირება „ ერთიანი ნაციონალური მოძრაობის“ წევრის, დავით მჟავანაძის განცხადებას მოჰყვა. სხდომის დაწყების დროს ის შეეცადა გაეკრიტიკებინა „უცხოური გავლენის გამჭვირვალობის შესახებ“ კანონი და სურდა გაეჟღერებინა მათი ფრაქციის მიერ სხდომის დატოვებაზე , თუმცა, ამის საშუალება მმართველი პარტიის დეპუტატებმა არ მისცეს. „ ქართული ოცნების“ დეპუტატმა, ქეთი ხომერიკმა სხდომაზე რუსული რუბლები მიიტანა და დავით მჟავანაძეს გადასცა, რასაც თავის მხრივ, ოპოზიციონერი წევრების გაღიზიანება მოჰყვა.

ხმაურის გამო საკრებულოს სხდომაზე შესვენება გამოცხადდა, თუმცა დეპუტატებს შორის სიტყვიერი დაპირისპირება დერეფანშიც გაგრძელდა.

„ნაციონალური მოძრაობის“ წევრების თქმით, აღნიშნული კანონი ქვეყნისთვის დამღუპველია.

საბოლოოდ, ფრაქცია „ ერთიანმა ნაციონალურმა“ მოძრაობამ სხდომა პროტესტის ნიშნად დატოვა და საკრებულოს ბოიკოტი გამოუცხადა.

„ფრაქცია „ ნაციონალურმა მოძრაობამ“ მიიღო გადაწყვეტილება,პროტესტის ნიშნად, რომელიც უკავშირდება გუშინ პარლამენტში მიღებულ რუსულ კანონს დაგვეტოვებინა საკრებულოს სხდომა და გამოგვეცხადებინა ბოიკოტი და ამ განცხადების გაკეთება გვინდოდა და სამწუხაროდ, როგორც ყოველთვის „ქართული ოცნების“ და უკვე რაღაც „ კომუნისტური პარტიის“ წარმომადგენლებმა, შეიძლება ასე ითქვას არ მოგვცა საშუალება, რომ ეს გვეთქვა და ჩვენი ამ კონსტიტუციით გარანტირებული ფორმა გამოგვეხატა და სიმბოლური იყო ის, რომ დღეს ისინი გამოცხადდნენ რუსული რუბლებით მე მათ მოვუწოდებ, რომ ეს რუსული რუბლები შეინახონ, რადგან დასჭირდებათ - ვეღარ იფრენენ დასავლეთის ქვეყნებში და წითელ მოედანზე აუცილებლად დასჭირდებათ სხვადასხვა მომსახურების მისაღებად. სამწუხაროა ის, რაც დღეს ჩვენს ქვეყანაში და ოზურგეთის საკრებულოში ხდება. საუბედუროდ, „ქართული ოცნების“ არცერთ დეპუტატს არ აღმოაჩნდა გამბედაობა შესწინააღმდეგებოდა რუსულ კანონს, კანონს, რომელსაც ჩვენი ქვეყანა მიჰყავს რუსეთისკენ და აცილებს ჩვენს დასავლელ პარტნიორებს”, - განაცხადა „ნაციონალური მოძრაობის წევრმა“, -დავით მჟავანაძემ.

ოზურგეთის საკრებულოს სხდომა განახლდა, თუმცა მას „ნაციონალური მოძრაობის“ დეპუტატები არ ესწრებიან.

დავით გოჩავა - ახლა ჩინეთმა თუნდაც „ჰონგ-კონგის პორტი“ ჩადგას ანაკლიაში, აზრი არ აქვს არაფერს - ევროპა „ანაკლიის პორტთან“, სავარაუდოდ, არ ითანამშრომლებს
ქართული პრესის მიმოხილვა 13.06.2024
„არქიმ“ და „დელოიტმა“ აუდიტის მომსახურების ხელშეკრულება გააფორმეს
ზაფხულის ყველაზე ცხელი შემოთავაზება HONOR-ისგან - დაიწყე ახალი სეზონი ახალ სმარტფონთან ერთად
Skillwill-ი კემბრიჯის უნივერსიტეტთან თანამშრომლობას იწყებს
„მოირგე დრო“ -  დეველოპერული კომპანია „ბიოგრაფი ლივინგის“ ახალი საკომუნიკაციო კამპანია
ისრაელის ელჩი ჰადას მეიცადი - ის, ვინც იწყებს ომს და შემდეგ აგებს, არ არის მსხვერპლი