„ნაციონალური მოძრაობა“, თავისი არსობით, ყველა შემადგენელი ნაწილით ბოიკოტს უცხადებს ცხრა პუნქტთან დაკავშირებულ კანონპროექტებზე მუშაობას, შესაბამისად, ბოიკოტს უცხადებს ევროინტეგრაციას, - ამის შესახებ საქართველოს პარლამენტის თავმჯდომარემ შალვა პაპუაშვილმა ჟურნალისტებთან საუბრის დროს განაცხადა.

როგორც მან აღნიშნა, საერთო ჯამში, ესეც კარგი მაჩვენებელია, სად არიან და რა მხარეს არიან.

„რამდენიმე ფრაქცია, მათ შორის „ნაციონალური მოძრაობაც“ ბოიკოტშია. ჩვენ, სხვათა შორის, დღეს განვიხილავთ ცხრა პუნქტთან დაკავშირებულ კანონპროექტებს მესამე მოსმენით. ადრეც მივუთითე, როდესაც ბოიკოტზეა საუბარი, ბოიკოტი არ არის რაღაც უხასიათობის გამო ბოიკოტი, ვიღაც არ მომწონს დარბაზში და ამის გამო ბოიკოტი, ან მეზარება და ა.შ. ბოიკოტი ნიშნავს, რომ პლენარულ სხდომაზე განსახილველ საკითხს უცხადებ ბოიკოტს. ამას ამბობს ჩვენი რეგლამენტი. გამოდის, რომ „ნაციონალური მოძრაობა“, თავისი არსობით, ყველა შემადგენელი ნაწილით ბოიკოტს უცხადებს ცხრა პუნქტთან დაკავშირებულ კანონპროექტებზე მუშაობას, შესაბამისად, ბოიკოტს უცხადებს ევროინტეგრაციას. საერთო ჯამში, ესეც კარგი მაჩვენებელია, სად არიან და რა მხარეს არიან“, – განაცხადა შალვა პაპუაშვილმა.