ჯაბა სამუშიამ საქართველოში პროფესიული განათლების პირველი კონფერენცია გახსნა

თბილისის სახელმწიფო უნივერსიტეტის ცნობით, რექტორმა, აკადემიკოსმა ჯაბა სამუშიამ საქართველოში პროფესიული განათლების პირველი კონფერენცია გახსნა, რომელიც პროფესიული პროგრამების სტუდენტებისა და მასწავლებლების მონაწილეობით გაიმართა.

უნივერსიტეტის ინფორმაციით, კონფერენცია „პროფესიული განათლება - ახალი შესაძლებლობა კარიერულ წინსვლაში“ ივანე ჯავახიშვილის სახელობის თბილისის სახელმწიფო უნივერსიტეტის პროფესიული განათლების ცენტრის ორგანიზებით ჩატარდა. ღონისძიების მიზანია პროფესიული განათლების მნიშვნელობის, გამოწვევების, სიახლეების, კარიერული განვითარების შესაძლებლობების შესახებ მსჯელობა.

თბილისის სახელმწიფო უნივერსიტეტის რექტორის ჯაბა სამუშიას თქმით, თსუ პროფესიული განათლების ცენტრში დღეისთვის 400-ამდე პროფესიული სტუდენტი სწავლობს, რომლებიც პროფესიული საგანმანათლებლო პროგრამების მნიშვნელოვან მიმართულებებს ეუფლებიან და კონკურენტუნარიანები არიან შრომით ბაზარზე.

„უახლოეს მომავალში, კიდევ დავამატებთ ისეთ მიმართულებებს, რომლებიც კიდევ უფრო მეტ შესაძლებლობას მისცემს ჩვენს სტუდენტებს, იპოვონ საკუთარი თავი შრომით ბაზარზე. ეს ღონისძიება არის პირველი შემთხვევა, როდესაც კონფერენცია ეძღვნება პროფესიულ განათლებას და არის ძალიან კარგი საშუალება, ვისაუბროთ იმ გამოწვევებზე, რაც ამ სფეროშია. პროფესიული განათლება არის ხვალინდელი დღე ჩვენი ქვეყნის და თბილისის სახელმწიფო უნივერსიტეტი მზად არის, მაქსიმალურად დაუჭიროს მხარი ამ მიმართულებას,“- განაცხადა ჯაბა სამუშიამ.

კონფერენციის გახსნას თსუ რექტორის მოადგილე კახაბერ ჭეიშვილი, საქართველოს განათლების, მეცნიერებისა და ახალგაზრდობის საქმეთა სამინისტროს პროფესიული განათლების განვითარების დეპარტამენტის უფროსი თამარ კვინიკაძე, განათლების ხარისხის განვითარების ეროვნული ცენტრის დირექტორის მოადგილე კახაბერ ერაძე, პროფესიული უნარების სააგენტოს ხელმძღვანელი ირინა მარგიშვილი, თსუ პროფესიული განათლების ცენტრის ხელმძღვანელი ლევან წიქარიძე, პროფესიული სტუდენტები, კურსდამთავრებულები და მასწავლებლები, მოწვეული სტუმრები ესწრებოდნენ.

ამასთან, როგორც ინფორმაციაშია აღნიშნული, საქართველოს განათლების, მეცნიერებისა და ახალგაზრდობის საქმეთა სამინისტროს პროფესიული განათლების განვითარების დეპარტამენტის უფროსის თამარ კვინიკაძის ინფორმაციით, ეს არის პირველი კონფერენცია, რომელიც გვაძლევს საშუალებას გახსნილად ვიმსჯელოთ ისეთ საკითხებზე, როგორიც არის პროფესიული განათლების მნიშვნელობა, არსებული გამოწვევები და კარიერული წინსვლის შესაძლებლობები. მისი თქმით, კარიერული განათლების მიმართულებით პროფესიული განათლების სისტემაში ბევრი სერვისია დანერგილი, რომლითაც შეუძლიათ ისარგებლონ სტუდენტებმა, კურსდამთავრებულებმა.

როგორც თსუ პროფესიული განათლების ცენტრის ხელმძღვანელმა ლევან წიქარიძემ აღნიშნა, ცენტრი ახორციელებს 7 პროგრამას თბილისში და 8 პროგრამას ქუთაისში, შრომის ბაზრის მოთხოვნის გათვალისწინებით შემოდგომაზე კიდევ 5 ახალი პროგრამა ემატება.

„თსუ პროფესიული განათლების ცენტრი ზრუნავს ჩვენი სტუდენტების პროფესიული უნარების განვითარებაზე. ვიმედოვნებ, ჩვენი ცენტრი მომავალში უფრო ფართოდ იქნება წარმოდგენილი და მომავალ წელს, უფრო მეტი მასწავლებელი და პროფესიული სტუდენტი შეუერთდება ამ კონფერენციას“,-განაცხადა ლევან წიქარიძემ.

„დღევანდელი კონფერენცია ძალიან კარგი შესაძლებლობაა ჩვენთვის, პროფესიული პროგრამების სტუდენტებისთვის, რომ გამოვთქვათ ჩვენი მოსაზრებები პროფესიული განათლებისა და კარიერული განვითარების შესაძლებლობების შესახებ და ვიმსჯელოთ იმ გამოწვევებსა და სიახლეებზე, რომელიც ამ კუთხით არსებობს“, - აღნიშნა თსუ პროფესიული განათლების ცენტრის სტუდენტმა ნია შაბურიშვილმა.

თსუ-ს ინფორმაციით, უნივერსიტეტში პროფესიული საგანმანათლებლო პროგრამები 2007 წლიდან ხორციელდება. 2019 წლიდან კი პროფესიული პროგრამების ადმინისტრირებას თსუ პროფესიული განათლების ცენტრი უძღვება. პროფესიულ განათლებაზე მოთხოვნა საქართველოში ყოველწლიურად იზრდება. თსუ პროფესიულ პროგრამებზე საშუალოდ 1 ვაკანტურ ადგილზე 8-10 აპლიკანტი აკეთებს განაცხადს.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ქართული პრესის მიმოხილვა 17.06.2024
ბორის სოკოლოვი - რუსეთისთვის ჩინურ იუანზე ორიენტაცია სახიფათოა, რადგან, ჩინურ ხელისუფლებას საკუთარი შეხედულებისამებრ შეუძლია იუანის კურსის დადგენა, სამწუხაროდ, ომი უკრაინაში 2024 წელს არ დასრულდება
შექმენი შენზე მორგებული კომბინაცია მობილური პაკეტით „მეტი“
„ბრიტანულ-ქართული აკადემიის“ დირექტორის, ნათია ჯანაშიას ადვოკატმა სს „საქართველოს კაპიტალის“ და შპს „საქართველოს განათლების ჯგუფის“ დირექტორების წინააღმდეგ პროკურატურას სარჩელით მიმართა
„არქიმ“ და „დელოიტმა“ აუდიტის მომსახურების ხელშეკრულება გააფორმეს
ისრაელის ელჩი ჰადას მეიცადი - ის, ვინც იწყებს ომს და შემდეგ აგებს, არ არის მსხვერპლი