მარნეულის მერიის ბაზაზე „ახალგაზრდული საბჭოს" ახალი შემადგენლობის შერჩევასთან დაკავშირებით, მოსწავლეებთან საინფორმაციო შეხვედრები გაიმართა. ამის შესახებ ინფორმაციას მარნეულის მერია ავრცელებს.

მათივე ცნობით, საინფორმაციო კამპანია, მარნეულის მუნიციპალიტეტის მერის მოადგილე თემურ შუბითიძის ხელმძღვანელობით, საბჭოს წევრების შერჩევისა და გასაუბრების ეტაპის უზრუნველყოფის მიზნით შექმნილი სამუშაო ჯგუფის მიერ, მუნიციპალიტეტის 11 სკოლაში ჩატარდა. შეხვედრებს, ასევე, ჯანდაცვის, სოციალური უზრუნველყოფის, კულტურისა და სპორტის სამსახურის უფროსი ნინო დეკანოიძე უძღვებოდა.

„კამპანიის ფარგლებში, პრეზენტაციები გაიმართა „ახალგაზრდული საბჭოს" შესახებ, მოსწავლეებს დაურიგდათ საინფორმაციო ბუკლეტები ქართულ, აზერბაიჯანულ და სომხურ ენაზე და სკოლებს გადაეცათ პლაკატები კონკურსის და საბჭოს საქმიანობის შესახებ.

შეგახსენებთ, რომ მარნეულის მუნიციპალიტეტის მერიის ბაზაზე, ახალგაზრდობის სააგენტოს მხარდაჭერით, ფუნქციონირებს „ახალგაზრდული საბჭო", რომლის მიზანია ადგილობრივი თვითმმართველობის მიერ, ახალგაზრდულ საკითხებზე გადაწყვეტილებების მიღების პროცესში ახალგაზრდების მონაწილეობა.

„ახალგაზრდული საბჭო" ირჩევა 2 წლის ვადით და დაკომპლექტდება 16-დან 29 წლის ჩათვლით, მარნეულის მუნიციპალიტეტის ტერიტორიაზე მცხოვრები, არანაკლებ 18 ახალგაზრდისგან.

ამასთან, მიმდინარეობს მარნეულის მუნიციპალიტეტის ახალგაზრდული პოლიტიკის დოკუმენტის განახლებაზე მუშაობა. აღნიშნულ პროცესში მნიშვნელოვანია მარნეულის მუნიციპალიტეტში მცხოვრები ადგილობრივი ახალგაზრდების პრიორიტეტული საკითხების განსაზღვრა, შესაბამისი ონლაინ კითხვარის მეშვეობით:

https://docs.google.com/forms/d/e/1FAIpQLSfS3orvvVMXj5FTexL8M19BPj-70fhpZXPlx1nqju8iXdtfuA/viewform“, - ნათქვამია ინფორმაციაში.