პარტია „მოქალაქეების“ სახელით მოვაწერე ხელი „ქართულ ქარტიას“, ეს არის გაერთიანება იდეის ირგვლივ. აქ არავითარ შემთხვევაში არ არის საუბარი საერთო სიაზე ან რაიმე სხვაზე, - ამის შესახებ პარტია „მოქალაქეების“ დეპუტატმა ქეთი თურაზაშვილმა ორბელიანების სასახლიდან გამოსვლის შემდეგ განაცხადა.

მისი შეფასებით, საზოგადოება წინასაარჩევნოდ რამდენიმე პოლიტიკური ცენტრის შექმნას დაინახავს და ფიქრობს, რომ არჩევნებში არცერთი მოქალაქის ხმა არ უნდა დაიკარგოს.

„პარტია „მოქალაქეების“ სახელით მოვაწერე ხელი „ქართულ ქარტიას“, ეს არის გაერთიანება იდეის ირგვლივ. აქ არავითარ შემთხვევაში არ არის საუბარი საერთო სიაზე ან რაიმე სხვაზე. ვინც ნახა „ქარტია“, დაინახა, რომ იქ გათვალისწინებულია აყველა მნიშვნელოვანი საკითხი, რომელიც ძირეულად ღირებულია დემოკრატიული სახელმწიფოს შექმნისთვის.

აქედან გამომდინარე, ჩვენ „ქართულ ქარტიას“ ხელი მოვაწერეთ. ცხადია, საზოგადოება წინასაარჩევნოდ იხილავს სხვადასხვა გაერთიანებებს. მე მინდა ხაზი გავუსვა და ვთქვა, რომ პატარა პარტიებმა, რომლებიც აცხადებენ, რომ დამოუკიდებლადაც გადალახავენ 5%-იან ბარიერს, საფრთხე არ უნდა შეუქმნან თავიანთი ამომრჩევლის ხმებს და სასურველია ორი ან მაქსიმუმ სამი ცენტრი შეიქმნას, რომლის ირგვლივაც მთელი ოპოზიცია იქნება გაერთიანებული და არცერთი ხმა, ჩვენი მოქალაქეების, საარჩევნოდ არ იქნება დაკარგული,” -განაცხადა ქეთი თურაზაშვილმა.