“ნაციონალური მოძრაობის” ერთ-ერთი ლიდერის, ანა წითლიძის განცხადებით, პრეზიდენტთან მიღებაზე განიხილეს “ქართული ქარტიის” მნიშვნელობა.

როგორც მიღების დასრულების შემდეგ წითლიძემ განმარტა, ეს არ არის ტექნიკური ერთობა და ვინ რა ფორმატით გაერთიანდება, ეს არის თითოეული პოლიტიკური პარტიის გადაწყვეტილება.

“შეხვედრა ეხებოდა ქარტიას, რომელსაც დღეს ხელი მოვაწერეთ, ვისაუბრეთ ამ ქარტიის მნიშვნელობაზე, იმაზე, რატომ არის ის მნიშვნელოვანი. ვისაუბრეთ იმაზე, თუ როგორ უნდა მოხდეს რეფორმების განხორციელება, რომელიც მნიშვნელოვანია საქართველოს ევროპული ინტეგრაციისთვის, განსაკუთრებით, იმ პირობებში, როდესაც ქვეყანას რუსული რეჟიმი მართავს. მნიშვნელოვანია, ამ ქარტიით ჩვენმა ამომრჩეველმა იცოდეს რას გააკეთებენ პროდასავლური პარტიები.

ეს არ არის ტექნიკური ერთობა და ამაზე პრეზიდენტმაც აღნიშნა, რომ არჩევნებზე, ვინ რა ფორმატით გაერთიანდება, ეს არის თითოეული პოლიტიკური პარტიის გადაწყვეტილება. საუბარია იმაზე თუ, როგორ წარმოუდგენიათ პროდასავლურ პარტიებს, ვინ შეიძლება აიღოს პასუხისმგებლობა, რომ არჩევნებში გამარჯვების შემდეგ, როგორი იქნება ქვეყანა და რა ძირითად რეფორმებზე უნდა შეთანხმდნენ პროდასავლური ცენტრები”, - განაცხადა წითლიძემ.