ფინანსთა მინისტრი ლაშა ხუციშვილი საქართველოში ვიზიტით მყოფ სლოვაკეთის რესპუბლიკის სამთავრობო დელეგაციას შეხვდა, რომლის შემადგენლობაშიც არიან: ქვეყნის ვიცე-პრემიერი, ეკონომიკის მინისტრი დენისა საკოვა, ფინანსთა მინისტრი ლადისლავ კამენიცკი, ეროვნული ბანკის პრეზიდენტი, პიტერ კაჟიმირი, „ექსიმ ბანკის“ გენერალურ დირექტორი რასტისცლავ პოდჰორეცი, სლოვაკეთის საგანგებო და სრულუფლებიანი ელჩი საქართველოში მატუშ ბუშოვსკი.

ამის შესახებ ინფორმაციას ფინანსთა სამინისტრო ავრცელებს.

მათი ცნობით, ფინანსთა სამინისტროში გამართულ შეხვედრაზე მხარეებმა ორ ქვეყანას შორის სავაჭრო-ეკონომიკური, საინვესტიციო მიმართულებით ურთიერთობის მიმდინარე საკითხები და სამომავლო თანამშრომლობის პერსპექტივები განიხილეს.

ლაშა ხუციშვილმა სლოვაკეთის დელეგაციის წევრებს მადლობა გადაუხდა, სლოვაკეთის მიერ საქართველოს ევროპული და ევროატლანტიკური ინტეგრაციის მხარდაჭერისთვის. მან დელეგაციის წევრებს ქვეყნის მაკროეკონომიკური მდგომარეობა და ბოლო წლებში განხორციელებული რეფორმები გააცნო.

მათივე ინფორმაციით, სტუმრებმა ხაზი საქართველოსა და სლოვაკეთს შორის პარტნიორობის დიდ პოტენციალს გაუსვეს და მზადყოფნა გამოთქვეს, გააგრძელონ ძალისხმევა ამ ურთიერთობების გასაძლიერებლად.