პარლამენტის პლენარულ სხდომის გახსნას 15:00 საათისთვის შეეცდებიან - სწორედ ამ დროისთვის დაინიშნა ხელახალი, რიგით მესამე რეგისტრაცია.

12:00 საათისთვის დანიშნული პარლამენტის სხდომა კვორუმის არარსებობის გამო ვერ გაიხსნა. რეგისტრაცია თავდაპირველად 71-მა დეპუტატმა გაიარა. ამის შემდეგ განმეორებითი რეგისტრაცია ჩატარდა, რა დროსაც ტაბლოზე 73 დეპუტატი დაფიქსირდა. პლენარული სხდომის გახსნას კი, სულ მცირე 76 დეპუტატის რეგისტრაცია სჭირდება.

პარლამენტის პლენარულ სხდომათა დარბაზში ოპოზიციიდან „გირჩის“ დეპუტატები და ასევე, თეონა აქუბარდია და ტარიელ ნაკაიძე იმყოფებოდნენ, რომელთაც რეგისტრაცია არ გაიარეს. დეპუტატ თეონა აქუბარდიას ინფორმაციით, პარლამენტის პლენარულ სხდომაზე უმრავლესობის დეპუტატებისა და „სოციალ - დემოკრატების“ ჩათვლით სულ 62 დეპუტატი იმყოფება და არა 73, რაც ტაბლოზე დაფიქსირდა.

„სხდომათა დარბაზში ფიზიკურად არ იმყოფებოდნენ კახა კახიშვილი, დიმიტრი ხუნდაძე, დიმიტრი სამხარაძე, თუმცა ჩავარდნილი რეგისტრაციის შედეგების თანახმად, მათ რეგისტრაცია გავლილი აქვთ. მიდის სხვა დეპუტატების გადამოწმება იმ კადრების მიხედვით, რომელიც სასესიო დარბაზში დღეს მედიამ გადაიღო“, - განაცხადა თეონა აქუბარდიამ.