კარგია, რომ პრეზიდენტი მზაობას გამოთქვამს ახალგაზრდებთან შესახვედრად. ჩვენ კითხვები გვექნება როგორც „ქართულ ქარტიასთან“, ისე მიხეილ სააკაშვილის თავისუფლებასთან დაკავშირებით. ამასთან, როგორ აპირებს საარჩევნო პროცესში ჩართვას, სადაც უნდა დავამარცხოთ „რუსული რეჟიმი“, - ამის შესახებ „ერთიანი ნაციონალური მოძრაობის“ ახალგაზრდული ორგანიზაციის მდივანმა, იგორ ნარმანიამ განაცხადა.

„პოზიტიურია ის ფაქტი, რომ სალომე ზურაბიშვილს სურს ახალგაზრდებთან შეხვედრა და ამასთან დაკავშირებით მზაობა გამოთქვა. რა თქმა უნდა, ჩვენ კითხვები გვექნება „ქართულ ქარტიასთან“ დაკავშირებით, მიხეილ სააკაშვილის თავისუფლებასთან დაკავშირებითაც. სააკაშვილის თავისუფლება მოხსენიებულია ევროპარლამენტის რეზოლუციაში. ასევე კითხვები გვექნება სალომე ზურაბიშვილთან, როგორ აპირებს ჩაერთოს საარჩევნო კამპანიაში, რომელიც გადის ბიძინა ივანიშვილის „რუსული რეჟიმის“ დასრულებაზე”, - განაცხადა იგორ ნარმანიამ, რომლის კომენტარსაც პარტიის პრესსამსახური ავრცელებს.