მასწავლებლები, პროფესორები, ლექტორები და მათი სოციალური პირობების გაუმჯობესება ერთ-ერთი ყველაზე მნიშვნელოვანი ამოცანაა და კარგია, რომ მინისტრმა აქაც პრინციპული გადაწყვეტილებები აჩვენა, - ამის შესახებ პარლამენტის თავმჯდომარის მოადგილემ არჩილ თალაკვაძემ პლენარულ სხდომაზე, განაცხადა სადაც „მინისტრის საათის“ ფორმატში, განათლებისა და მეცნიერების მინისტრ გიორგი ამილახვარს მოუსმინეს.

არჩილ თალაკვაძის განმარტებით, პედაგოგების სოციალური პირობები უმჯობესდება და უკვე ივლისიდან მათ ხელფასები კიდევ გაეზრდებათ.

„მასწავლებელი, რომელიც გაკვეთილების და ლექციის ჩატარების დროს ფიქრობს ელემენტარულ საბაზისო, სოციალურ საკითხებზე, შეუძლებელია ბოლომდე შეძლოს თავისი პოტენციალის რეალიზება, ბოლომდე იყოს კონცენტრირებული და გადართული იმ ამოცანაზე, რასაც ქვია განათლების მიწოდება. ამიტომ როგორი თავდადებულებიც არიან მასწავლებლები, როგორი თავდადებულებიც იყვნენ ისინი ყველაზე რთულ დროს, როდესაც საქართველოს სჭირდებოდა - დღეს სახელმწიფოს მოვალეობაა აჩვენოს თავდადება და საპასუხო მხარდაჭერა მათ", - განაცხადა არჩილ თალაკვაძემ.