რუსეთის პრეზიდენტი, ვლადიმერ პუტინი 18-19 ივნისს კორეის სახალხო დემოკრატიულ რესპუბლიკას ეწვევა, - ინფორმაციას რუსული მედია კრემლის პრესსამსახურზე დაყრდნობით ავრცელებს.

„კორეის სახალხო დემოკრატიული რესპუბლიკის სახელმწიფო საქმეთა თავმჯდომარის, კიმ ჩენ ინის მიწვევით, პრეზიდენტი ვლადიმერ პუტინი 18-19 ივნისს, მეგობრული სახელმწიფო ვიზიტით, კორეის სახალხო დემოკრატიულ რესპუბლიკას ეწვევა“, - ნათქვამია განცხადებაში.

რუსული მედიის ცნობით, პუტინი ჩრდილოეთ კორეას ბოლოს 2000 წელს ეწვია და რესპუბლიკის მაშინდელ ლიდერს, კიმ ჩენ ირს შეხვდა.

ამასთან, ვიეტნამის სახელმწიფო მედიის ცნობით, ვლადიმერ პუტინი 19-20 ივნისს ვიეტნამს ეწვევა. მათივე ინფორმაციით, პუტინი ქვეყანაში ვიეტნამის კომუნისტური პარტიის ხელმძღვანელის, ნგუენ ფუ ჩონგის მიწვევით ჩავა.