შეერთებული შტატები შეშფოთებას გამოხატავს რუსეთის პრეზიდენტის, ვლადიმერ პუტინის განცხადებასთან დაკავშირებით, რომ ჩრდილოეთ კორეისთვის რუსული იარაღის მიწოდებას არ გამორიცხავს.
„წარმოუდგენლად შემაშფოთებელია. ამან, შესაძლოა, კორეის ნახევარკუნძულის დესტაბილიზაცია გამოიწვიოს“, - განაცხადა აშშ-ის სახელმწიფო დეპარტამენტის პრესსპიკერმა, მეთიუ მილერმა.
მისივე თქმით, კორეის სახალხო დემოკრატიული რესპუბლიკისთვის იარაღის მიწოდებამ ასევე შეიძლება დაარღვიოს გაერო-ს უშიშროების საბჭოს რეზოლუციები, რომლებსაც თავად რუსეთმა დაუჭირა მხარი.
ცნობისთვის, გუშინ ვლადიმერ პუტინმა ჟურნალისტებთან საუბრისას განაცხადა, რომ მოსკოვი „იტოვებს უფლებას, მსოფლიოს სხვა რეგიონებს, და არ არის გამორიცხული ჩრდილოეთ კორეას, იარაღი მიაწოდოს. „დასავლელები აწვდიან იარაღს უკრაინას და აცხადებენ : და შემდგომ ჩვენ აღარაფერს ვაკონტროლებთ და არ აქვს მნიშვნელობა როგორ გამოიყენება ის. ასევე შეგვიძლია ვთქვათ, ვიღაცას რაღაც მივაწოდეთ და შემდეგ არაფერს ვაკონტროლებთ“, - აღნიშნა პუტინმა.