თავად დაზარალებულს [ქეთევან ჯავახიშვილს] აქვს ფსიქოლოგთან ნათქვამი, რომ მასზე ბრალდებულის [ოთარ ცინდელიანის] მხრიდან სისტემატურად ხორციელდებოდა ფიზიკური და ფსიქოლოგიური ძალადობა,- ამის შესახებ 21 წლის ქეთევან ჯავახიშვილის მკვლელობის საქმის პროკურორმა ლევან ვეფხვაძემ განაცხადა.

როგორც ის აღნიშნავს, დაცვის მხარის კითხვები მოკლულის მშობლების დისკრედიტაციის მოხდენას ემსახურებოდა.

„დღევანდელ სასამართლო პროცესზე დაიკითხნენ გარდაცვლილის მშობლები. დედის ჩვენებით დადასტურდა მნიშვნელოვანი გარემოება, ბრალდებული სისტემატურად ძალადობდა ქეთევან ჯავახიშვილზე.

რაც შეეხება დაცვის მხარეს, მთელი პროცესის განმავლობაში ვუსმენდი დაცვის მხარის შეკითხვებს და ვერ გავიგე, რა უნდათ. კითხვები, რომელიც მიმართული იყო დაზარალებულისკენ, გარდაცვლილის დედისკენ და მამისკენ, იყო ერთი გარემოების მანიშნებელი, რომ როგორმე დისკრედიტაცია მოეხდინათ გარდაცვლილის მშობლების. ბრალდებულის პოზიცია არ ვიცით რა არის, ვინაიდან ვერც დაცვის მხარისგან ვერ გავიგეთ რა უნდა. შესაბამისად დაზარალებულებმა დეტალური ინფორმაცია მიაწოდეს სასამართლოს. ამავდროულად, საქმეზე დაიკითხება მოკლულის ფსიქოლოგი, ფსიქიატრი, გამოიკვლევა ყველა მტკიცებულება, ელექტრონული მესიჯები და საბოლოო ჯამში დადასტურდება ჩადენილი დანაშაული.

ის ფაქტი, რომ ესპანეთში ბრალდებული ძალადობრივ ქმედებებს ახორციელებდა ქეტევან ჯავახიშვილის მიმართ, ეს მოწმეთა ჩვენებებითაც დადასტურებულია, საქმეზე გამოთხოვილი ინფორმაციითაც და პლუს, ჩვენ ესპანეთისგან სამართლებრივი დახმარების კუთხით გამოთხოვილი გვაქვს სრული ინფორმაცია, რა ხდებოდა და რა ინფორმაციას ფლობს ოთარ ცინდელიანზე.

თავად დაზარალებულს აქვს ფსიქოლოგთან ნათქვამი, რომ სისტემატურად ხორციელდებოდა მასზე ფიზიკური, თუ ფსიქოლოგიური ძალადობა, ბრალდებულის მხრიდან",- განაცხადა ვეფხვაძემ.

ცნობისთვის, ქეთი ჯავახიშვილი 28 თებერვალს, ლილოში, სახლთან ახლოს მოკლეს. სამართალდამცავებმა მომხდართან დაკავშირებით მოკლულის შეყვარებული, ოთარ ცინდელიანი დააკავეს, რომელიც ამასთანავე, მოკლულის ნათლიის შვილია.

ცინდელიანი უწყებაში თავად გამოცხადდა, თუმცა, პროკურატურის ინფორმაციით, მას ქვეყნის დატოვების მცდელობა ჰქონდა.

ქეთი ჯავახიშვილს სხეულის თითქმის ყველა ორგანოზე 59 ჭრილობა ჰქონდა მიყენებული, ყველა მათგანი სიცოცხლის დროინდელი იყო.

ოთარ ცინდელიანს ბრალდება საქართველოს სისხლის სამართლის კოდექსის 109-ე მუხლის „თ“ და „მ“ ქვეპუნქტით (განზრახ მკვლელობა, ჩადენილი გენდერის ნიშნით, განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.