ქუთაისში უხვი ნალექის შედეგად მდინარე ოღასკურა კალაპოტიდან გადმოვიდა.

წყალმა სრულად დატბორა ბუხაიძის ქუჩა.

ადგილობრივების თქმით, მოვარდნილი ნალექის შედეგად, სრულიად დაზიანდა ქუჩაზე გაჩერებული ავტომობილები, დაიტბორა კორპუსების სარდაფები, ასევე, წყალმა დააზიანა საცხოვრებელი სახლების და მაღაზიების პირველი სართულები.

ამ დროისთვის, მოსახლეობის ნაწილს არ მიეწოდება ელექტროენერგია.

წვიმამ პრობლემები შექმნა სხვა ქუჩებზეც. სტიქიის ზონებში მუშაობენ შესაბამისი სამსახურები.

მერიის ააიპ სპეციალური სერვისების ინფორმაციით, სტიქიის ყველა ლოკაციაზე მიმდინარეობს შესაბამისი სამუშაოები, გამოყვანილია მძიმე ტექნიკა, მიმდინარეობს სათანადო ღონისძიებები. მათივე ინფორმაციით, სანიაღვრე სისტემის პრობლემა არ არის და პრობლემა გამოიწვია უხვმა ნალექმა. ამ დროისთვის, კი ელოდებიან წვიმის ინტენსივობის კლებას, რომ სამუშაოები აქტიურ რეჟიმში გაგრძელდეს.