[ევროპული საბჭოს სამიტზე] იქნება ისევ ის განცხადებები, რაც ჩვენ ადრე მოვისმინეთ - არჩევნებში საქართველოს, ანუ „ქართული ოცნების" გამარჯვება დაასრულებს ამ სპეკულაციებს, - ამის შესახებ „ქართული ოცნების" დეპუტატმა, ირაკლი ქადაგიშვილმა ევროპული საბჭოს სამიტთან დაკავშირებით საუბრისას განაცხადა.

მისივე თქმით, ყველა რეიტინგით, რითაც კი ქვეყნის წარმატება იზომება, საქართველო არის ლიდერი ქვეყანა.

„სანქციების თემა ურთულესი არის საქართველოსთან მიმართებაში ერთი ძალიან მარტივი მიზეზის გამო. ყველა ობიექტური მონაცემით, მათ შორის, ასოცირების ხელშეკრულების შესრულების კუთხით, რეკომენდაციების შესრულების კუთხით, ყველა რეიტინგით, რითაც კი ქვეყნის წარმატება იზომება, საქართველო არის ლიდერი ქვეყანა. ეს პოლიტიკური მიზნები, რაც ჩვენ ამ ხნის განმავლობაში საქართველოს ევროკავშირთან დაახლოების გზაზე ვიხილეთ, ჯერჯერობით რჩება. არჩევნებამდე ალბათ, ასე გაგრძელდება. არჩევნებში საქართველოს, ანუ "ქართული ოცნების" გამარჯვება დაასრულებს ამ სპეკულაციებს, " - განაცხადა ქადაგიშვილმა.