პრემიერი - ახალგაზრდებისთვის ანაზღაურებადი სტაჟირების პროგრამა, რომელიც სექტემბრიდან ამოქმედდება, 3 000-მდე კურსდამთავრებულს მისცემს როგორც საჯარო სამსახურში, ისე კერძო სექტორსა და მუნიციპალიტეტებში ანაზღაურებადი სტაჟირების გავლის საშუალებას

განაცხადების მიღება დაიწყება უახლოეს მომავალში და პირველი სექტემბრიდან 3 000-მდე კურსდამთავრებულს მიეცემა როგორც საჯარო სამსახურში, ისე კერძო სექტორში და მუნიციპალიტეტებში ანაზღაურებადი სტაჟირების გავლის საშუალება, - ამის შესახებ პრემიერ-მინისტრმა პარლამენტში ყოველწლიურ მოხსენებაში განაცხადა.

მთავრობის მეთაურმა აღნიშნა, რომ ახალგაზრდობის მიმართულებითაც ძალიან მნიშვნელოვანი ღონისძიებები ხორციელდება.

„ახალგაზრდობის მიმართულებითაც გვქონდა მნიშვნელოვანი ღონისძიებები, გუშინ დასრულდა „სტუდფესტი“, ბანაკები ანაკლიაში, შაორზე არის ძალიან მნიშვნელოვანი, ეს პროექტები განხორციელდება ზაფხულის განმავლობაში. ძალიან მნიშვნელოვანია ახალგაზრდებისთვის ანაზღაურებადი სტაჟირების პროგრამა, რომელიც სექტემბრიდან ამოქმედდება. პარლამენტმა მიიღო ამ მიმართულებით კანონი და ამ კანონს სჭირდებოდა სათანადო რეალიზება, ხორცშესხმა და სწორედ, ამისთვის საქართველოს მთავრობამ შეიმუშავა ანაზღაურებადი სტაჟირების პროგრამა. შესაბამისი განაცხადების მიღება დაიწყება უახლოეს მომავალში და პირველი სექტემბრიდან 3 000-მდე კურსდამთავრებულს მიეცემა როგორც საჯარო სამსახურში, ისე კერძო სექტორში და მუნიციპალიტეტებში ანაზღაურებადი სტაჟირების გავლის საშუალება. ეს იქნება 4-თვიანი სტაჟირება. წელს გვექნება ეს პროექტი საპილოტე რეჟიმში, მომავალ წლებში კი ვეცდებით უფრო მეტად დავხვეწოთ ეს პროგრამა“, - აღნიშნა პრემიერმა.

პრემიერმა სპორტის მიმართულებაზეც ისაუბრა და განაცხადა, რომ საქართველომ არაერთ საერთაშორისო ტურნირს უმასპინძლა და ამ მიმართულებით ძალისხმევა მომავალშიც გაგრძელდება.

„სპორტზე უკვე ბევრი ვისაუბრე, გვაქვს უპრეცენდენტო წარმატებები. არა მხოლოდ გუნდურ სახეობებში, არამედ ინდივიდუალურ სახეობებშიც. ასევე ძალიან მნიშვნელოვანია, რომ ჩვენმა ქვეყანამ უმასპინძლა არაერთ საერთაშორისო ტურნირს. შარშან ზაფხულში ვუმასპინძლეთ ახალგაზრდულ ევროპის ჩემპიონატს ფეხბურთში. ძალიან დიდი წარმატებით და მადლობა ამისათვის კულტურისა და სპორტის სამინისტროს და ასევე ფეხბურთის ფედერაციას. თებერვალში ვუმასპინძლეთ კადეტთა, იუნიორთა და 21-წლამდელთა ევროპის ჩემპიონატს კარატეში. მარტში მესტიამ უმასპინძლა ფრირაიდის მსოფლიო ტურს. 300 მლნ-ზე მეტი ტელემაყურებელი პირდაპირ ეთერში ადევნებდა თვალყურს ამ ტურნირს, რომელიც გაიმართა მესტიაში. აპრილში გუდაურმა უმასპინძლა სნოუბორდში ახალგაზრდულ მსოფლიო ჩემპიონატს. რა თქმა უნდა, ამ მიმართულებით მომავალშიც გაგრძელდება ძალისხმევა“, - განაცხადა პრემიერმა.

მთავრობის მეთაურის თქმით, საქართველო 2026 წელს უმასპინძლებს ძიუდოს ევროპის ჩემპიონატს და ამასთან დაკავშირებით განაცხადი უკვე დამტკიცებულია.

„ჩვენ 2026 წელს ვუმასპინძლებთ ძიუდოს ევროპის ჩემპიონატს. ამასთან დაკავშირებით გაკეთდა განაცხადი და უკვე დამტკიცდა ჩვენი განაცხადი. ქართული ძიუდო ჩვენთვის არის ძალიან მნიშვნელოვანი და ძალიან მნიშვნელოვანია, რომ 2026 წელს ევროპის ჩემპიონატი გაიმართება საქართველოში. ასევე განაცხადი გვაქვს წარდგენილი 2025 და 2026 წლებში რაგბის 20 წლამდე მსოფლიო ჩემპიონატის ჩასატარებლად. იმედი გვაქვს, რომ საერთაშორისო რაგბის კავშირი ჩვენს ამ განაცხადს მოიწონებს, რისი დიდი ალბათობაც არსებობს.

განხორციელდა ეროვნული, ოლიმპიური და ასაკობრივი ნაკრებების წევრთა, მწვრთნელთა, ადმინისტრაციული და საექიმო პერსონალის, ასევე პერსპექტიულ სპორტსმენთა სტიპენდიების პროგრამის რეფორმა; სპორტსმენების სტიპენდია საშუალოდ 50%-იდან 70%-მდე გაიზარდა, ხოლო მწვრთნელებისა და ექიმების − 35%-იდან 50%-მდე.

დაიწყო ფიზიკური აღზრდისა და სპორტის სახელმწიფო სასწავლო უნივერსიტეტის ახალი, ევროპული სტანდარტების შესაბამისი შენობის მშენებლობა, რომელიც მომავალ წელს შევა ექსპლუატაციაში“, - განაცხადა პრემიერმა.

დიმიტრი ცქიტიშვილი - ხელისუფლებამ იცის, რომ ამერიკასთან ურთიერთობების დალაგების კუთხით ჩიხშია, ახლა მათ ერთადერთი ამოცანა აქვთ - არჩევნები მოიგონ და შემდეგ თქვან: ხალხმა ჩვენ აგვირჩია და დაანებეთ თავი ამ ქვეყანას
ვახტანგ ხმალაძე - თბილისის საქალაქო სასამართლოს მოსამართლე პრეზიდენტის კონსტიტუციურ უფლებამოსილებებში შეიჭრა, რისი უფლებაც მას არ ჰქონდა
ქართული პრესის მიმოხილვა 22.07.2024
კახა ოქრიაშვილი - „ოცნების“ ორმაგი და სამმაგი თამაში ომამდე მიგვიყვანს
კახეთის გზატკეცილზე „კარფურის” სუპერმარკეტი უკვე გაიხსნა
„ბიოგრაფი ლივინგი“ დეველოპერულ ბაზარზე მოღვაწეობის პირველივე წლის ბოლოს მე-4 ახალ პროექტს იწყებს
Keepz-მა ღია ბანკინგის ლიცენზია მიიღო