ფინეთმა უკრაინის დახმარების 159 მილიონი ევროს ღირებულების პაკეტი გამოაცხადა

ფინეთმა უკრაინისთვის მორიგი სამხედრო დახმარება გამოაცხადა. ინფორმაციას უკრაინული მედია ფინეთის თავდაცვის სამინისტროზე დაყრდნობით ავრცელებს.

უწყების ცნობით, უკრაინის თავდაცვის 24-ე მხარდაჭერის პაკეტი ჰელსინკს, დაახლოებით, 159 მილიონი ევრო დაუჯდება. გადაწყვეტილება მთავრობის რეკომენდაციით რესპუბლიკის პრეზიდენტმა მიიღო. გავრცელებული ინფორმაციით, საუბარია სამხედრო ტექნიკის მიწოდებაზე.

„ოპერაციული მიზეზების გამო და დახმარების უსაფრთხო მიწოდების უზრუნველსაყოფად, დამატებითი ინფორმაცია არ იქნება მოწოდებული დახმარების კონკრეტული შემადგენლობის, მიწოდების მეთოდის ან გრაფიკის შესახებ“, - აღნიშნულია ფინეთის თავდაცვის უწყების ინფორმაციაში.

უწყების განცხადებით, ფინეთი მზად არის, მხარი დაუჭიროს უკრაინას რუსეთის გაუმართლებელი აგრესიის წინააღმდეგ ბრძოლაში.

„საუბარია არა მხოლოდ უკრაინას, არამედ, ბოლოს და ბოლოს, ყველა თავისუფალი ხალხის არსებობის უფლების საკითხზე“, - განაცხადა ფინეთის თავდაცვის მინისტრმა, ანტი ჰაკანენმა.

ფინეთის თავდაცვის სამინისტროს ინფორმაციით, ქვეყნის მიერ უკრაინისთვის მიწოდებული თავდაცვითი საშუალებების ჯამური ღირებულება 2.2 მილიარდ ევროს შეადგენს.

ირაკლი მელაშვილი - ხელისუფლებასა და ოპოზიციას შორის რაიმე იდეოლოგიური კომპრომისის ადგილი ფაქტობრივად აღარ არსებობს, არჩევანია ან აქეთ - ევროპისკენ, ან იქით - რუსეთისკენ
ქართული პრესის მიმოხილვა 18.07.2024
კახეთის გზატკეცილზე „კარფურის” სუპერმარკეტი უკვე გაიხსნა
„ბიოგრაფი ლივინგი“ დეველოპერულ ბაზარზე მოღვაწეობის პირველივე წლის ბოლოს მე-4 ახალ პროექტს იწყებს
Keepz-მა ღია ბანკინგის ლიცენზია მიიღო