სომხეთისა და უკრაინის საგარეო საქმეთა მინისტრები ხორვატიაში ერთმანეთს შეხვდნენ, - ამის შესახებ ინფორმაციას სომხეთის საგარეო საქმეთა სამინისტრო ავრცელებს.
სომხეთის საგარეო საქმეთა სამინისტროს ცნობით, არარატ მირზოიანისა და დმიტრო კულებას შეხვედრა დუბროვნიკის ფორუმის ფარგლებში გაიმართა.
შეხვედრაზე მხარეებმა რეგიონული და ევროკავშირთან თანამშრომლობის საკითხები განიხილეს.
„მინისტრი მირზოიანი სომხეთსა და აზერბაიჯანს შორის ურთიერთობების ნორმალიზაციის ბოლო დროს განვითარებულ მოვლენებს შეეხო და რეგიონული უსაფრთხოების უზრუნველყოფის კონტექსტში სამშვიდობო ხელშეკრულების ხელმოწერის მნიშვნელობას ხაზი გაუსვა“, - ნათქვამია სომხეთის საგარეო უწყების განცხადებაში.