ეს სპორტსმენი მსოფლიოში გამოჩენილი სპორტსმენია, მას ფოტო უამრავ ადამიანთან აქვს გადაღებული - ირაკლი კობახიძე და კახა კალაძე არ გამოირჩევიან რაიმე განსაკუთრებულობით იმ პირთა შორის, ვისაც ეს მსოფლიო ჩემპიონი შეხვედრია, - ასე ეხმაურება პარლამენტის პირველი ვიცე-სპიკერი გია ვოლსკი პრემიერ მინისტრის, თბილისის მერისა და “ქართული ოცნების“ საპატიო თავმჯდომარის ბიძინა ივანიშვილის შვილის UFC-ის მებრძოლთან, დაღესტნელ სპორტსმენ ხაბიბ ნურმაგომედოვთან შეხვედრას.
ვოლსკის შეფასებით, „თუკი ხაბიბ ნურმაგომედოვი დღეს რუსეთის ფედერაციას წარმოადგენს, ეს რაიმე ღირსებას არ აკლებს იმის გამო, რა მიღწევებიც მას სპორტში გააჩნია“.
„ალბათ სპორტული მიღწევებია თემა, რაზეც მათ ისაუბრეს, თუმცა ალბათ ირაკლი კობახიძე ან კახა კალაძე დაადასტურებს, რა თემაზე შეიძლება ელაპარაკათ ადამიანთან, რომელიც ჩემპიონია სპორტში - ბრძოლა წესების გარეშე. დამერწმუნეთ, ამ თემის იქეთ არც იქნებოდა საუბარი.
თუ ფოტოებითა და ვიდეო ჩანაწერებით ვიმსჯელებთ, მისი ურთიერთობების წრე გაცილებით უფრო ფართოა, რაც რაიმე პოლიტიკურ ინსინუაციებს არ ეხება“, - განაცხადა გია ვოლსკიმ.
