პორტუგალიელი ულტრამემარჯვენეები ევროპარლამენტში ვიქტორ ორბანის ალიანსს შეუერთდებიან, - ამის შესახებ ინფორმაციას უნგრეთის პრემიერ-მინისტრის პრესსამსახურის ხელმძღვანელი, ბერტალან ჰავასი ავრცელებს.

უნგრეთის პრემიერ-მინისტრის პრესსამსახურის ხელმძღვანელის ცნობით, პორტუგალიური ულტრამემარჯვენე პარტია „ჩეგა!“ ევროპარლამენტში ახალ პოლიტიკურ ჯგუფს „პატრიოტები ევროპისთვის“ შეუერთდება.

„ჩეგა!“-ს ლიდერმა, ანდრე ვენტურამ განაცხადა, რომ შესაძლოა პარტია ევროპარლამენტში შექმნილ ახალ პოლიტიკურ ჯგუფს ოთხშაბათს შეუერთდეს.

9 ივნისს გამართულ ევროპარლამენტის არჩევნებში პორტუგალიურმა პარტიამ ორი მანდატი მიიღო.

შეგახსენებთ, გუშინ, უნგრეთის პრემიერ-მინისტრმა, ვიქტორ ორბანმა, ავსტრიის ულტრამემარჯვენე „თავისუფლების პარტიის“ ლიდერმა, ჰერბერტ კიკლმა და ჩეხეთის ყოფილმა პრემიერ-მინისტრმა, ანდრეი ბაბიშმა ევროპარლამენტში ახალი მემარჯვენე ჯგუფის შექმნის შესახებ გამოაცხადეს.