აშშ-ის თავდაცვის სამინისტრომ განაცხადა, რომ უკრაინისთვის Patriot-ისა და NASAMS-ის საჰაერო თავდაცვის სისტემებისთვის 2.2 მილიარდი აშშ დოლარის ღირებულების ჩამჭრელებს შეიძენენ.

უწყების განმარტებით, დახმარების პაკეტის შესყიდვა უკრაინის უსაფრთხოების დახმარების ინიციატივის (USAI) ფარგლებში მოხდება.

„ეს თანხები გამოყენებული იქნება უკრაინისთვის Patriot-ისა და NASAMS-ის საჰაერო თავდაცვის სისტემების ჩამჭრელების შესაძენად“, - ნათქვამია აშშ-ის თავდაცვის სამინისტროს განცხადებაში.

მათი განმარტებით, შედეგად, უკრაინა მიიღებს ჩამჭრელებს, რომლებიც მას სასწრაფოდ სჭირდება, რათა თავისი მოსახლეობა და კრიტიკული ინფრასტრუქტურა რუსეთის საჰაერო თავდასხმებისგან დაიცვას.

შეგახსენებთ, უკრაინისთვის 150 მილიონი აშშ დოლარის სამხედრო დახმარების ახალი პაკეტის გამოყოფა თეთრმა სახლმაც გამოაცხადა.