ამ დეკლარაციაში საქართველოსთან დაკავშირებული, პრაქტიკულად, ყველა პუნქტი გაურკვეველია კობახიძისთვის - ეს ადამიანები მზად არიან ბიძინა ივანიშვილს ემსახურონ ცხოვრების ბოლომდე და იცხოვრონ დიქტატურის ქვეშ, რასაც არც ჩვენ და არც ქართველი ხალხი არ შეეგუება, - ასე გამოეხმაურა პარტია "ერთიანი ნაციონალური მოძრაობის" წევრი პეტრე ცისკარიშვილი, საქართველოს პრემიერ-მინისტრის, ირაკლი კობახიძის განცხადებას ეუთოს საპარლამენტო ასამბლეაზე მიღებულ რეზოლუციასთან დაკავშირებით.
მისი შეფასებით, ეუთოს მიერ მიღებული რეზოლუცია, რომელშიც საქართველოზეა საუბარი, "ქართული ოცნებისთვის" მოსაწონი ვერ იქნება, ვინაიდან მიაჩნია, რომ მმართველი პარტიისთვის მტკივნეულ თემებზეა საუბარი.
"ამ დეკლარაციაში საქართველოსთან დაკავშირებული, პრაქტიკულად, ყველა პუნქტი გაურკვეველია კობახიძისთვის. ისინი პირდაპირ ეწინააღმდეგებიან საქართველოს ეროვნულ ინტერესებს, ისევე როგორც იმ დემოკრატიულ ფასეულობებს, რომელზეც ევროპა, ეუთო და ევროკავშირი დგას.
ეს ადამიანები მზად არიან ბიძინა ივანიშვილს ემსახურონ ცხოვრების ბოლომდე და იცხოვრონ დიქტატურის ქვეშ, რასაც არც ჩვენ და არც ქართველი ხალხი არ შეეგუება. რა თქმა უნდა, ამას ხედავენ და ამის წინააღმდეგ არიან ევროპაშიც და ბუქარესტის დეკლარაციაში ეს ყველაფერი აისახა.
რუსეთის ჯარებმა რომ უნდა დატოვონ საქართველოს ტერიტორია, ეს ცხადია და გამეორებული იქნება არაერთხელ. ესეც გარკვეულწილად აშინებთ "ქართული ოცნების" წარმომადგენლებს, მაგრამ გაცილებით უფრო მტკივნეული პუნქტები მდგომარეობს შემდეგში - იქ საუბარია საარჩევნო პროცესზე, რომ დიდი რისკი და საფრთხეა, რომ "ოცნებამ", შესაძლოა, კიდევ ერთხელ დრამატულად გააყალბოს არჩევნები, ამიტომ არის მოწოდება, რომ გრძელვადიანი სადამკვირვებლო მისიის დამკვირვებლები ჩამოვიდნენ დასავლეთიდან. ასევე არის ძალიან მკაფიო ტექსტი, რომ რუსული კანონის მიღებით ბიძინა ივანიშვილი და მისი გუნდი საქართველოს შიგნით, დემოკრატიულ ღირებულებებს ძირს უთხრის. ეს მუხლები კი მისთვის [ირაკლი კობახიძისთვის] გაუგებარია და არ მოსწონს", - განაცხადა პეტრე ცისკარიშვილმა.
ცნობისთვის, ირაკლი კობახიძის თქმით, "ამ რეზოლუციაში მთელი რიგი გაუგებარი ჩანაწერები მოხვდა".
"ამ რეზოლუციაში მოხვდა მთელი რიგი გაუგებარი ჩანაწერები, რაც ძალიან დასანანია, ძალიან სამწუხაროა, თუმცა ეს არის არსებული მოცემულობა და ამის იქით არ მინდა სიღრმეში შევიდე", - განაცხადა პრემიერ-მინისტრმა.
