„უკრაინელი ლტოლვილი ქალების გაძლიერება ტექში“ - BTU გაეროს ქალთა ორგანიზაციისა და იაპონიის მთავრობის მხარდაჭერით, ახალ პროექტს იწყებს
საქართველოში მცხოვრები უკრაინელი ქალების გასაძლიერებლად ბიზნესისა და ტექნოლოგიების უნივერსიტეტი, გაეროს ქალთა ორგანიზაციისა და იაპონიის მთავრობის მხარდაჭერით, ახალ პროექტს განახორციელებს. „უკრაინელი ლტოლვილი ქალების გაძლიერება ტექში“ - ასე ჰქვია ინიციატივას, რომლის ფარგლებშიც ბენეფიციარები ტექნოლოგიებს შეისწავლიან.
პროგრამაში მონაწილეობას მიიღებს 55 უკრაინელი ლტოლვილი ქალი, რომლებიც სააპლიკაციო წესით შეირჩევა. სწავლა ივლისის ბოლოს დაიწყება და 8 თვის განმავლობაში გაგრძელდება. პროგრამა დასრულდება უკრაინელ ქალთა სათემო პლატფორმის დაარსებით, რაც კიდევ უფრო გააძლიერებს მათი მხარდაჭერის ქსელს.
როგორც ბიზნესისა და ტექნოლოგიების უნივერსიტეტში განმარტავენ, ინიციატივა მიზნად ისახავს უკრაინელი ლტოლვილი ქალებისთვის სხვადასხვა მიმართულებით ტექნოლოგიური განათლების გაზიარებასა და პრაქტიკული ჩვევების გაძლიერებას. ის ხელს შეუწყობს ინკლუზიური და მრავალფეროვანი ტექნოლოგიური გარემოს განვითარებას, ასევე, ტექნოლოგიური ინდუსტრიაში არსებული გენდერული უთანასწორობის შემცირებასა და ძლიერი ეკოსისტემის შექმნას.
რაც შეეხება სასწავლო პროგრამას, ის მოიცავს ციფრული წიგნიერებისა და ტექნოლოგიური ინგლისურის უნარების განვითარებას, ტექნოლოგიურ კურსებს პროგრამული პროდუქტების ტესტირებისა და გრაფიკული დიზაინის მიმართულებებით. პარტნიორი ორგანიზაციების დახმარებით, პროექტის მონაწილეები შეისწავლიან პრაქტიკულ კომპონენტებს, რაც დაეხმარება მათ რეალურ მაგალითებზე დამყარებული, მაქსიმალურად სასარგებლო ცოდნა და გამოცდილება მიიღონ.
„უკრაინელი ლტოლვილი ქალების გაძლიერება ტექში” წარმოადგენს გაეროს ქალთა ორგანიზაციის ევროპისა და ცენტრალური აზიის რეგიონული ოფისის პროექტის “უკრაინელი ლტოლვილი ქალებისა და გოგოების მდგრადობის გაძლიერება მასპინძელ ქვეყნებში” ნაწილს, რომელიც იაპონიის მთავრობის დაფინანსებით ხორციელდება. პროექტი მიმართულია იმ მწვავე პრობლემების გადაჭრაზე, რომლებსაც ომისა და იძულებით გადაადგილების შედეგად, ქალები და გოგოები ყველაზე ხშირად აწყდებიან. საქართველოში პროექტი ორ ძირითად კომპონენტს მოიცავს: უკრაინელი ლტოლვილი ქალებისთვის მაქსიმალურად ინკლუზიური, უსაფრთხო, კომფორტული სივრცის შექმნასა და ახალი კარიერული შესაძლებლობების შექმნის მიზნით, მათი ტექნოლოგიური მიმართულებებით გადამზადებას.
პროექტის ოფიციალური პრეზენტაცია უკვე გაიმართა, რომელსაც იაპონიის ელჩი საქართველოში იშიძუკა ჰიდეკი, გაეროს ქალთა ორგანიზაციის წარმომადგენელი საქართველოში კაორი იშიკავა და ბიზნესისა და ტექნოლოგიების უნივერსიტეტის რექტორი ნინო ენუქიძე ესწრებოდნენ.
(R)
